Shillong, Naiwieng 17: U myntri ka tnat Public Health Engineering (PHE) u bah Renikton Lyngdoh Tongkhar hynne ka sngi u la pynksan ba ka tnat kam pat kynran dien ban pyndep noh iaka projek Greater Shillong Water Supply Scheme (GSWSS) Phase-III mynta u snem 2022.
“Watla ki don ki jyrwit jyrwat hynrei naka liang ka tnat bad ki kontraktor ba pyntrei ia kane ka projek GSWSS-III ki dang bteng ban pyntrei iala ki kam ki jam ban pynthikna ba kane ka projek kan dep noh hapoh u bnaiu Nohprah 2022” la ong u bah Renikton.
U bah Renikton u la kam ba ki jyrwit jyrwat ba pynslem ban pyndep iaka projek GSWSS-III kadei namar ka jingbym ioh jingmynjur na ki katto katne ki shnong ne ki bor shnong ne ka tnat PWD (Road) ban tih thliew ban thep iaki Pipe um.
U la iathuh ba ka tnat kala ioh jingujor na bun tylli ki shnong khamtam kiba hap hapoh ka thain Mawlai namar kane ka jingtih thliew ban thep iaki Pipe um kala wanrah ka jingjot rathai ki surok kum hapoh ka thain Upper Shillong bad Mawlai.
“Nga la iakren bad ki kontraktor ba kidei ban wad ki lad lynti kumno ban iawir jingmut bad ki dorbar shnong lane bad ki tnat sorkar bapher bapher naka bynta ban pyntyllun iaki kam ban pyndep iaka projek GSWSS-III ka ban wanrah ka jingmyntoi iaki paidbah ka nongbah Shillong baroh kawei” la ong u bah Renikton.
Nalor kane u bah Renikton u la iathuh ba dang shen ka sorkar jylla ka la mang bad la pyllait haduh T. 65 klur naka bynta ban pyndep iaka projek Greater Shillong Water Supply Scheme Phase-III kaba la sahkut mynta la bun bun snem.
