Tura, Naitung 26: U Deputy Commissioner ka West Garo Hills, ula pynbna ia ka khusnam pisa sha kino kino ki briew kiba lah ban ai jingtip ka ban lam sha ka jingiohkem ia ki briew kiba kynshoit ban pynmih ia ka jingkulmar bad hiar thma ia ka Chief Minister Office, Tura katba dang iaid ka jingialang hapdeng u Myntri Rangbah ka Jylla Conrad K Sangma bad ki Sengbhalang ha ka 24 tarik Naitung.
Une u Khliehduh ka District ula pynbna ia ka song pisa ba T. 10,000 kum ka khusnam sha kino kino ki briew kiba lah ban ai ia ki jingtip ba donkam sha ki Magistrate ne ki Pulit ka ban lam sha ka jingiohkem ia ki briew ba hakhmat eh kiba kynshoit. La ong ba ia ki briew ba ai jingtip ruh yn sa buhrieh bha.
Ki Pulit ka West Garo Hills haduh mynta, kila iohkem haduh 21 ngut ki briew kynthup ki Nongialam ba hakhieh kum u Nongialam ki samla ka TMC Richard Marak bad arngut ki Nongialam ka BJP Mohila Morcha kiba iasylla ban pynkulmar bad kawang maw ia u Myntri Rangbah ka Jylla.
“Ka bor District kan iai bteng ban kem ia kum kine ki briew kiba pyndonkam ia ki kam pyntriem tang ban myntoi ha ka kam sain pyrthei. Katto katne na kine ki briew la lah ban ithuh bad ki dang iaphetrieh mynta na ki kti ka ain” ong ka bor District ha ki rynsan social media ha kaba la sam ruh ia ki phone nombor jong ki Magistrate bad Pulit na ka bynta ki paid bah ba kin ai jingtip.
Ki bor District kila khot ruh ia ki Nongshongshnong ban synniang lem ha kaban tei ia ka Jylla bad ban pynneh ia ka shong suk shongsain ha sor Tura.
“Ka synniang jong phi kan iarap bha ha kaban wanrah ia ka roi ka par ia ka District bad ia ka sor. Kine ki 24 kynta ban wan kin dei kiba kongsan bha” kala bynrap.
Lah ban kdew hangne ba ki bor District ka West Garo Hills kila pynari da ka korphiw miet naduh ka por 9 baje mynmiet haduh 5 baje mynstep ha Tura khlem da buh por haduh lano kan treikam.
Pule ruh: Assam: Kurup ki Pulit ia u drok ba shongdor T. 45 klur, kem 3 ngut ki nongkhaii
