Shillong, Jylliew 10 : Ka Sonam Raghuvanshi, ka briew ba pyniap klep iala u jong u lok ba dang shu dep iathoh shongkurim dang 12 sngi, u Raja Raghuvanshi, kala thong pisa haduh T.20 lak ia ka kynhun nongpyniap briew ba kin shim noh ia ka jingim u Raja.
Ka Sonam kala iasuhbuit ban leh ia kane ka kam bymman bad la u jong u samla ba kala ia ieid la katto katne snem uba kyrteng u Raj Kushwaha.
U Raja Raghuvanshi, uba pyniaid ia ka kam kamai kali na Madhya Pradesh, ula iathoh bad ka Sonam ha ka 11 tarik Jymmang.
Kat kum ka jingiathuh ki kynhun tohkit, ka jingiasuhbuit ban pyniap ia u Raja kala sdang naduh ka 16 tarik Jymmang, tang san sngi ba dep ban iathoh shongkurim. Ka Sonam kala kular iala u baieid ba hadien ka jingiap u Raja, kan sa long ka thei iap lok bad kan sa iathoh pat sa bad u, da ka jingkyrkhu lang jong u Kpa.
Ka Sonam kala buh jingmut ban iathoh shongkurim ia u Raj Kushwaha hadien ba kala kylla long ka thei iap lok. Kala ong ha u Kushwaha : “To ngin pyniap ia u Raja bad ngin leh ha ka rukom ka ban iohi kum ka kam lute. Hadien ba nga la long thei iap lok, u Kpa jong nga un sa ai jingmynjur ia ka jingiathoh jong ngi” kala ong ha u, iathuh ka khubor.
Ki Pulit kila iathuh ba tiar ba pyndonkam ban pyniap ia u Raja, ka wait, ka dei kaba la shu order online ha Guwahati. Kine ki nongpyniap kila bud ia kine ki shijur naduh Guwahati bad kila sah ha ka hotel ba jngai tang da ki kilometre na ka homestay ba ki sah hashuwa ban leh ia kane ka kam bymman. Ka dei ka Sonam kala pyni lynti ia ki sha ka jaka ba ka don bad u kurim lyngba ka GPS.
Ha ka jingtohkit, la iohksai ba ha ka 23 tarik Jymmang, ha ka nam ban iashondur, ka Sonam kala khroh ia u Raja ban leit sha ka jaka pynieng kali ha Kshaid Wei Sawdong kaba kynjah jar jar. Arngut na ki runar kila jam lypa shakhmat bad ap ia u Raja katba ka Sonam ka la iaid suki suki bad dei haba iohi ia ka jingbym don briew, kala pyrta “pyniap ia u”.
La iathuh ba u Vishal Chauhan ula pduh da ka wait na ka khlieh katba uwei pat u runar u Akash Rajput, ula ap na jngai da ka thuk thuk ban peit briew khnang ban nym don ba iohi.
Haba nyngkong, kine ki runar kila pynpaw ia ka jingartatien ban leh ia kane ka kam namar ka jingthait na ka jingkiew ia ki mawkyndon ka Nongriat hynrei ka Sonam kala thong ia ki haduh T.20 lak ba kin pyndep noh ia ka kam. Ka Sonam kala air uh ia ka pisa T.15,000 na ka bek pisa u Raja kum ka advance.
La iathuh ba hadien kane ka jingpyniap, ka Sonam kala phet na Shillong sha Guwahati ha kane ka juh ka janmiet. Kala kiew ha ka rel bad iaid lyngba ka Varanasi sha Ghazipur, haba pynjulor ruh ia ka mobile phone ban nym don ba lah ban lap ia ka.
Wat hapdeng kine ki jingpyrshang ban pynduh pyndam ia ki dien jong ka, ka jingdonkti jong ka Sonam kala mih pyrthei na ka jingioh ring video CCTV ba pyni ba ka iaphone bad ia phah msg bad ki suba nongpyniap bad ruh ia ki record phone briew ba ka phone sha u Raj Kushwaha, ia kaba la shem ba u don ha Indore. Ia une u briew la kem pat hadien.
Haba sngewthuh ba kam don jaka shuh ban phetrieh, ka Sonam kala khuslai jur bad khatduh kala hap ban wan pyndem ialade ha ka jaka bam harud surok ha Uttar Pradesh.
