Nongstoin, Lber 12 : Ka kynhun ki runar ha ka miet sngi Ba-ar, kila leit ban thombor ia ka Iingsah jong ka para u MLA ka Mawshynrut, kaba don ha ka shnong Seinduli, Riangdo, West Khasi Hills District.
Kane ka Iing ka dei jong ka kong Theresa Dkhar, kaba dei ka para trai jong u MLA Bah Methodius Dkhar. Kane ka jingjia kala jia ha ka por 11:30 baje mynmiet.
Kane ka kynhun ki runar kala thombor da kaba kawang maw ha ryngkat ki bilor ia ka iingsah jong kane ka Longkmie hynrei bhabok ba ha kane ka jingjia, ym shym la don kano kano ka jingmynsaw jong ki briew ba don hapoh Iing.
La iathuh ba ha kane ka por, ki briew kiba don ha Iing kila iamih ban iapeit shabar bad ki runar kila phet krad noh na katei ka jaka. Kine ki briew ba iamih na Iing kila iohi tang ia kawei ka kali kaba pyndonkam da kine ki nongthombor kaba dei ka Grand Vitara ba don u nombor ML10-D-0254.
Ha ka jingwad jingtip, la kynnoh ba kane ka kali ka dei jong uwei u briew uba la tip kyrteng u Skhemborlin Hoojon.
Halor kane ka jingjia, i trai Iing Kong Theresa Dkhar bad u kurim Bah Alberal Thongni, kila leit ban ujor da ka ejahar ha Riangdo Police Station.
Kat kum ka khubor, ki Pulit ka Riangdo kila ioh ban kem ia uwei u briew uba suba donkti ha kane ka kam thombor ia uba la tip kyrteng u Firstbonshine Paliar uba dei na ka shnong Seinduli-1.
Ka jingtohkit ia une u briew ka dang iaid shakhmat ban lapdien ia kiwei kiwei kiba donkti lang.
