Shillong, Nailar 09 : Ka kynhun ki runar bala kiengatiar bha na Bangladesh, kila hiar thma ha kawei ka shnong khappud ka South West Khasi Hills, bad kila shoh bad dung ia uwei u rangbah ha ka step sngi Thohdieng.
Kat kum ka khubor Pulit, kane ka jingjia kala jia ha ka por 1 baje mynstep ha ka shnong Rongdongai kaba hap hapoh ka thain Nongjri-Nonghyllam, kaba don ha khappud ka Bangladesh.
La iathuh ba kumba 9 ngut ki runar na Bangladesh, kiba rah bad ki tiar pynmynsaw kynthup ka pistol, kila wan rung sha kane ka shnong bad kila shoh bad dung ia uwei u briew ba kyrteng u Balsrang A Marak, uba pyrshang ban khanglad ia ka jingwan rung jong ki.
Hadien kane ka jingthombor, kine ki runar kila phet noh na kane ka shnong. Ki Pulit ki suba ba kine ki runar kim pat phet satia sha Bangladesh namar ba don ki nongshongshnong kiba iohi ia ki ha ka thain khlem da poi pyrkhat pat ba ki dei ki runar.
Ki Pulit ki pyntip ba kine ki runar ki lah ban dei jong ka kynhun kaba treikam lang ha ryngkat ka jingiadon bynta ki Pulit ka Bangladesh. Kane ka jingsuba ka mih hadien ka jingioh kurup ia kawei ka Identity Card jong uwei u Pulit ka Bangladesh na kane ka jaka ba shah shoh u Balsrang.
Ka khubor ka suba jur ba kane ka kynhun ki runar kala wan rung sha Meghalaya da ka jingthmu ban rahbor ia ki trai shnong ban ioh dawa pisa, haba khmih ia ka rukom pynkhreh jong ki bad ki tiar ba ki rah kynthup ka pistol, ki walkie-talkie bad kiwei kiwei.
Ki trai shnong kila ioh kurup ruh ia katto katne ki tiar jong kine ki nongthombor kynthup ia ka ID ki Pulit ka Bangladesh bad ka pisa Bangladesh, ia kaba la shimti noh da ki Pulit kum ki sakhi.
