Thoh u Nongtrei monsngewbha sha u CM | Pyrshah ba ai jaka haduh palat 2 hectare na Balpakram Park

Shillong, Jymmang 26: U nongtrei mon sngewbha Cherian Momin ula kyntu ia u Myntri Rangbah ka jylla Conrad K Sangma ban tuklar lem halor ka jingkynnoh ba kala don ka jingai jaka kaba haduh 2.548 hectares na ka jaka jong ka Balpakram National Park ban shna pynheh ia ka surok.

Ha ka shithi kaba la phah sha u Myntri Rangbah, u Cherian Momin ula pynpaw ia ka jingbynniaw bad ka jingpyrshah kaba jur ia ka sorkar jylla kaba la pynmih ia ka notification ne jingpynbna paidbah ban ai jaka kaba 2.548 hectares na ka khlaw Balpakram National Park (BNP) na ka bynta ban pynheh ia ka State Highway 4 na Maheshkhola shaduh Kanai.

Ula ong, ba ka Balpakram ka bat ia ka jinglong tynrai ha ka niam ka rukom bad ka kolshor jong ki jaidbynriew Garo. Ka long kum ka jaka kaba kyntang ha kaba ia ki riti dustur bad kaba la suhthied naduh ki pateng barim bajah. Kano kano ka jingleh kaba buh ha ka jingma ia katei ka jaka kaba kyntang kan pynjulor ia ka kolshor jong ka imlang sahlang.

Ula ong ba ka jingpynheh ia ka surok kan pynthud ia ka shong ka sah jong ki mrad bad ia ki jingthaw ki bapher bapher bad kan ktah ruh ia ka sawdong sawkun jong ki jingim bad ki jingdon jingem ha katei ka jaka bad ia ka mei mariang.

Ka long kaei kaei kaba la kren shai ba ki surok ki long kum ki diengpynkiang ia ki mrad kaba lam sha ka jingkiew jongka jingiap na ka jingshah tynrah ha ki kali. Ka jingtei kaba kynthup ia ka jingpyntwa ia ka khyndew, ka jingbret pathar ia ki jaboh kan pynmih ruh ia jingpynsniew ia ka khyndew bad ka jingpynjaboh ia ki um ki wah kiba kynthup ia ka Wah Kanai bad kan ktah jur bha ia ka sawdong sawkun jong ka Park baroh kawei.

Nalor kane, katei ka projek kan pynshlur ruh ban kyntur pud be-aiñ ia ka BNP bad kan lam pat sha ka jingpynkhyllem ia ki dieng bad ban pyniap ia ki mrad.

Ula ong ba ka jingshna pynheh ia ka surok mynta kan ai jingmyntoi kaba tang shipor ka ban ym lah pat ban ianujor bad ka jingktah kaba shi rta ia ka jinglong jingman jong ka mariang bad ia ki jingim bad jingthaw bapher kiba don ha ka. Ka jingpynjulor ia ka BNP kan long ka jingiapeiñ ia ka jinglong jingman jong katei ka Protected Area, kaban ktah ia ka kam jngohkai bad ia ki kam ban pynneh pynsah ia katei ka khlaw.

U Momin ula pyntip ba katei ka Notification kaba la pynmih da u Commissioner and Secretary ka Forest & Environment Department, u Pravin Bakshi, lyngba ka bor kaba la pynkup lyngba ka sub-section (6) jongka Section 35 jongka Wildlife (Protection) Act, 1972, bad hadien ka jingiasyllok bad ka Standing Committee jongka National Board for Wildlife, la ai bor ia u Chief Wildlife Warden, Meghalaya ban ai ia la jingbit ban ai jaka, watla kila don ki jingbuh kyndon jongka Standing Committee jongka National Board for Wildlife ban py duna ia ka jingktah kaba buh hakhmat ia ka jinglong khuid bad ia ka jinglong jingman jong katei ka jaka baroh kawei kadei kaei kaei kaba ym shim la shimkhia bha.

“Nga kyntu ia ka sorkar ba kan pyrkhat biang ia ka rai kaba kala shim bad ban pynlong ia ka jingiasyllok bad ki shnong ki thaw ban wad ia ki lad ki lynti kiba biang kaban burom ia ka jingngeit tynrai bad ban pynneh ia ka jinglong kyntang jongka Balpakram. Kano kano ka jongiaid shakhmat ha kaban kyntur ia ka jaka kaba la hiar pateng naduh ki por hyndai hynthai kan mih beit ka jingpyrshah kaba jur bad kanjingbym lah ban pdiang” ong u Momin ha ka dorkhas.