Shillong, Lber 10 : U Myntri Rangbah ka Jylla Conrad K Sangma, ula phah biang da ka jingthoh sha ka National Testing Agency (NTA), ba kyntu ba kan pyllait ia ka Jylla Meghalaya na ka jingtreikam jong ka Common University Entrance Test (CUET).
U Conrad haba phah ia kane ka jingthoh, ula pynkynmaw ruh ba ka NTA kala dep ban ai jingmynjur ha u bnai Jymmang 2022, ba kan pyllait ia ka Meghalaya na ka jingtreikam jong ka CUET.
U Conrad ula phah ia kane ka shithi sha u Myntri ka Tnad Pule Puthi ka Ri u Dharmendra Pradhan myn ha ka 7 tarik u bnai Lber, 2023.
Kat kum kane ka shithi, u Conrad ula pynkynmaw ba ha u snem bala lah, ka Jylla kala kyrpad ia ka Ophis jong u (Pradhan) ban pyllait ia ka Meghalaya na ka jingtreikam ka CUET kat kum ka shithi bala phah ha ka 25 tarik Iaiong, 2022 ha kaba u (Pradhan) ula ai jingmynjur lyngba ka jubab bala phah ha ka 11 tarik Jymmang 2022.
U Conrad ula pyntip ruh ba ka Sorkar Jylla kala shim ia ka sienjam ban thaw iala ka jong ka State University, ka ban sa ioh noh shen ia ka jingmynjur na u Lat ka Jylla.
Nalor kane, u Conrad ula pyntip ruh ba ka Jylla Meghalaya ka dang shu dep pynlong ia ka elekshon MLA, kaba dang shu dep pynbna ia ka result ha ka taiew bala lah. U ong ba kane kala pynslem ia ka jingpynlong ia ka State Board Examination bad namar kata, ki samla pule kila mad ia shibun ki jingeh ban pynkhreh ia ka CUET jong ki jaka pule Under Graduate kiba don hapoh ka Jylla.
U Conrad ula ong ba kane ka jingeh kala mih namar ba bun ki college bad ki jaka pule ki dei kiba pyniasoh ialade bad ka North Eastern Hill University (NEHU).
“Nga kyrpad ia ka Ophis jong phi (Pradhan) ban pyllait ia ka Meghalaya na ka jingpynlong ia ka CUET” ong u Conrad.
