Thoh ka NESO sha ka Sorkar Pdeng | Wad, pynphai ia ki nong Bangla, khang dam ia ka khapud India-Bangladesh, pyntrei ia ka ILP ha NE

Shillong, Naiwieng 19: Ka North East Students’ Organisation (NESO) kala dawa na ka sorkar pdeng ba ka dei ban wad mar dor bad ban phah leitphai noh ia baroh ki nong Bangladesh ba wan ban rung be-ain bad ban khang dam noh ia ka khappud ka Ri India-Bangladesh bad ban pyntreikam ia ka Inner Line Permit (ILP) ha ka thain Shatei Lam Mihngi baroh kawei.

Kine ki dei shi bynta jong ka jingdawa napdeng ki 11 tylli ki mat kiba la aiti lyngba u Lat ka jylla Meghalaya u CH Vijayashankar ha ka sngi Baar.

“(Ngi kyntu ruh) ia ka sorkar pdeng ba kan pynkhlain ia ka jingtehlakm ha ki thain khappud bad ban khmih bniah khamtam ha ki jaka kiba don ka jingshah ktah bha, da kaba buh pynbun da ki shipai bad ban peitngor da kaba pyndonkam ia ki kor ki bor katkum kane ka juk kaba mynta bad ban pyllait ruh na ka jingpyntreikam ia ka Citizenship (Amendment) Act 2019 bad ia ka Immigration and Foreigners (Exemption) Order, 2025 ha ka thain shatei lam mihngi baroh kawei” ong u Chairman ka NESO u Bah Samuel B Jyrwa ha ka dorkhas.

Ka NESO kala dawa ruh ban pyntreikam ruh ia ka Assam Accord ha ka lynti kaba pura, ban ai jingiada ia ki jaidbynriew riewlum ka Assam katkum ka riti synshar ka ri katkum ki jingai jingmut jong Justice Biplab Kumar Sarma Committee kaba la thaw da ka sorkar bad ruh ban ai jingiada ia ki jaidbynriew riewlum ka Tripura katkum ka riti synshar ka ri, ban pynkhreh ia ka National Register of Citizens (NRC) na ka bynta ka thain shatei lam mihngi baroh kawei, da kaba pyntreikam ia u snem ot kyrteng katkum ka jinglong ka histori ha man la ki jylla bad ruh ban khmih bniah biang ia ka NRC jongka Assam.

Nalor kane, kala dawa ban pyntreikam ia ka Inner Line Pass (ILP) na ka bynta ka thain shatei lammihngi baroh kawei ban iatreialng bad ki jylla kiba marjan bad ki bor kiba dei khmih ban pynthikna ba ki phetwir kin ym dei tang ban shu buh ha kano kano ka jaka ha ka thain, dei ban pynneh bad iada ia ka hok jongki jaidbynriew riewlum, ka kolshor, ka ktien ka thylliej, ka kam synshar khaddar ha ka kam sain pyrthei bad ka jinglongtrai ia ka khyndew lyngba ki ain ki kanun bad ki polisi treikam bad ban thaw ruh ia ka Special Review Committee ban khmih bniah ia ka jingbun paid kynsan ha ki katto katne ki jaka”.

“Ngi kyntu ia ka sorkar India ba kan shimkhia thikna ia kane ka mat bad iaka jinglong kyrkieh bha jong ka kam. Ka jinglong jingman ka jaka, ka jingkylla jong ka kolshor ia kaba la iohi tyngkrein ha ki bynta jong ka thain, kidei ki jingmaham ban buh ha ka jingma kaba khraw. Lada ym shim ia ki sienjam kiba tyngeh mynta, ka jinglongtynrai jong ki riewlum ka thain shatei lammihngi ka lah ban shah pynduh ne shah pynjot noh” ula bynrap.

Ha ka shithi, ka NESO kala maham ba lda ym pyrkhing thikna ia ka jingwan rung ki briew kiba nabar naduh u snem 1947 kala buh ha ka jingma kaba khraw ia ka jinglong jingman, ia ka imlang sahlang, ka ioh ka kot, ka jinglong jingman ha ka thain bad ka jinglah ban ioh ia ka jingskhem ha ka synshar khaddar ha ka thain shatei lammihngi.

Da kaba ai nuksa ia ka jylla Tripura, ha kaba ki jaidbynriew riewlum kila kylla ritpaid noh hala ka ri bad ka jingiaid bteng jong ka jingiaid jingieng jong ki briew kiba na kiwei pat ki ri hapoh Assam kaba la sdang naduh u snem 1985 Assam Accord, ka NESO kala kdew ia ki jingkular kiba la khlei hynrei ia kaba ym shim la pynurlong pat haduh mynta.

Ka Dorkhas kala kdew ruh ia ka jingjur jong ka jingiakhih ha Meghalaya ha u snem 1979, 1987 bad mar ia sdang jong u snem 1990 bad ka jingkylla jong ka jinglong jingman ki jaka ha Assam kaba pyni ba kala mih ka jingkynrum kynram sha ki jylla kiba marjan kynthup ia ki bynta jong ka rilum Garo Hills.

Kala banjur ba ka jingeh ka long kaba kongsan ia ki jaidbynriew ritpaid, kaba buh ha ka jingma ia ka ktien ka thylliej, ka riti ka dustur bad ia ka jingioh jingithuh ha kaba iadei bad ka kolshor.

Ka NESO kala kynthoh ruh ia ki policy kiba dang shen jong ka sorkar pdeng, kum ka Citizenship (Amendment) Act 2019 (dei ban pyllait noh na ka jingpyntreikam ha ka thain shatei la mmihngi bad ia ka Immigration and Foreigners (Exemption) Order 2025 kaba nang pynheh shuh shuh ia ka jinglong jingman da kaba ailad ia ki phetwir na Afghanistan, Bangladesh bad Pakistan ban shong neh hapoh ka ri India.