Thoh ka Harijan Panchayat Committee ban pyllait iaka Them Metor na ka Parking Policy

Pynkynmaw ia ka jingiakynad pher Jaidbynriew bad ki Khasi ha u 2018

Shillong, Nailar 04 : Ka Harijan Panchayat Committee (HPC), kala thoh ia ka Sorkar Jylla ba kyrpad ban pyllait noh ia ka Them Metor (Punjabi lane) na ka Parking Policy ba hap siew pisa ban pynieng kali harud surok.

Kat kum ka shithi bala phah sha ka Deputy Commissioner ka East Khasi Hills ha ka 1 tarik Nailar, u Secretary ka HPC ula ong ba kum ki nong shongshnong ka Them Metor, ki ju pynieng naduh hyndai hynthai ia ki kali bad kali arshaka sha shiliang jong ka surok Shaheed Bhagat Singh Road hakhmat ki iing ki sem kumba long kiwei ki shnong ki thaw khlem da pynthut ia kiwei pat ki kali ba iaid ba ieng.

Ula ong ba ka jingpyntreikam ia ka Parking Policy ba hap siew pisa ban pynieng harud surok, kan ym tynrong shuh shuh ia ka jinglut jingsep hynrei kan buh ruh ia shibun ki jingeh ia ki briew ba shong ba sah ha ka thain.

“Namar ka thain ka dei ka jaka sah briew, ngi ngeit ba ka Parking Policy ban siew pisa, ka dei kaba kham iahap bha ban pyntreikam ha ki jaka ba thnem ka iew ka hat bad ba bun ki nongiaid nongieng” ula ong.

Ha kane ka shithi bala phah ruh sha u Symbud Myntri Rangbah ba khmih ia ki kam Pohiing (Police), une u Nongialam ka HPC ula pynkynmaw ia ka jingkynad pher Jaidbynriew kaba jia hapdeng ki paid Khasi bad ki Harijan ha u bnai Jylliew 2018, kaba jia tang na ka jaka pynieng kali, ha kaba u nongniah ka bos ula leit pynieng ia ka kali hajan ka kor um.

U ong ba ia kane ka jingjia kaba rit, ka nang pynheh bad aiding haduh ba ki bor District kila hap pynjari ia ka korphiw bad ka kyndon 144 CrPC ban tehlakam ia ka jingiakynad bad haduh mynta kila don ki jingpyrshang na ki dkhot jong ka seng Hynniewtrep National Liberation Council (HNLC) kiba thmu ban buh bomb IED ha Them Metor ha ka 10 tarik Lber 2023 ban pynim ia kane ka jingiakynad.

Ula pynpaw ba ka Sorkar Jylla kala pynieng ia ki jaka pahara ha ka jaka rung bad jaka mih jong ka Them Metor ban pynthi kna ia ka jingshngain jong ki nongshongshnong ka thain naduh u Jylliew 2018 haduh mynta mynne.

Halor kane, ula pynpaw ba ka jingpyntreikam ia ka Parking Policy ba hap siew pisa ban pynieng kali harud surok, kan ym ktah tang ia ka leit ka wan ki nongshongshnong hynrei ka buh ruh ha ka jingma ia ka jingshngain jong ki. U ong ba lada ym shah shuh ban pynieng kali ia ki nongshongshnong ka thain hajan iing, lane pynbor ia ki nongshongshnong ban leit set ia ki kali sha ki jaka ba kham jngai, kane ka lah ban buh ha ka jingma ia ka jingshngain jong ki.