SHILLONG, Risaw 06: Ki nonghikai kontrak hapoh ka shatri Meghalaya Government Lower Primary School Contractual Teachers Association (MGLPSCTA) ha ryngkat ki khun ki kti kila ialum lang hajan u Mot Kiang Nangbah ha Barik da ka jingtmu ban tur sha Secretariat.
Lah ban kdew ba kane ka jingiakhih ki nonghikai kontrak ka la neh mynta kumba 29 sngi bad mynta ki la rai ban tur beit sha Secretariat namar ka jingleh kuman ka sorkar ia ki jingdawa jong ki.
Naka liang u nongialam ki nonghikai kontrak u Babu Birbor Riangtem u la ong ba kane ka rai kaba ki nonghikai ki shim ban tur noh sha Secretariat kadei namar baka sorkar kam khein snep iaki bad ka jingthmu ban iakhih ha Secretariat kadei namar ka jaka ba ki don mynta jngai than na Secretariat.
U bah Birbor ula ong ba kane ka sorkar ka leh saiñ pyrthei pynban ïa ka kam ki nonghikai contract namar ha Dadenggre kaba dei ka konstitwensi u myntri ka tnat ka koit ka khiah u James Sangma haduh palat 100 ngut ki nonghikai ki dang bteng ban hikai wat haduh kine ki sngi ruh katba kiwei pat ki nonghikai ki la shah beh kam lut.
Ula ong ruh ba kane ka jingleh ka sorkar ka pyni ba u James u dei u Boss jong ka sorkar jylla (MDA) bad ula ong ruh ba kane ka jingbeh kam ka sorkar ka la pynlong wat ki nonghikai ban mad ïa ka jingjia ba sngewsih eh namar ki don ki nonghikai kiba khlad noh na ka daw ka jingshah beh kam bad ki don ruh kiba duh ei ïa ki khun ki kti namar ka jingbym don pisa ban ai jingsumar.
