Jowai, Naitung 04 : Hadien ka jingjop jong ka Football Fan Park ha Shillong, ka Sorkar Jylla ka don jingthmu ban buh ia kajuh ka Fan Park ha Jowai bad Tura khnang ba ki riewieid phutbol kin ioh ban leit peit live iaka FIFA World Cup 2026
U Myntri ki kam ialehkai ka Jylla Bah Wailadmiki Shylla ula pynpaw ia kane ha ka sngi Saitjain haba kren sha ki nongthoh khubpr ha ka jingleit khmih ia ka jingshna bha ia ka madan Aitnar jong ka Seinraij Ialong ha West Jaintia Hills.
Ka Sorkar kala dep ban buh ia ka Fark Park ha SRGT Parking Lot ha Polo Shillong, da kaba pynieng ia ka LED Screen kaba heh bha ban pyni ia ki jingialehkai World Cup kaba khlem siew pisa sha u paidbah.
“Haba iohi ia ka jingshongshit ki paidbah kiba wan ban peitkai bad kyrshan iala ki kynhun ha Polo, bad haba tip ba ki paidbah ka Meghalaya ki dei kiba ieid bha ia ka phutbol, u Myntri Rangbah ula bthah ia ngi ban buh ia ki Fan Park ha kiwei ki jaka jong ka Jylla” ong u Bah Wailad.
U iathuh ba ka Tnad Sports kala rai ban buh sa artylli ki Footbal Fan Park, kawei ka Jowai bad kawei ha Tura.
“Namar ba Round of 16 sngi kan sa sdang, kine ki Fan park kin ai ia ki riewieid phutbol ia ka jaka ba kin ialum lang ban iamuja ka peitkai ia ki jingiakhun. Kan nang pynsngewtynnad shuh shuh ia ki nongleit peitkai” ong u Myntri.
Halor ka Jowai Fan Park, u Bah Wailad ula ong ba ka Tnad ka dang wad mynta ia ka jaka kaba biang eh ban pynieng ia ki LED Screen.
“Ngi kwah ban long ha ka jaka pdeng kaba lah ban wan da baroh, Tang mar syn dep rai ia ka jaka, ngin sa pyntip ia ki paidbah” ula ong.
