Jowai, Naitung 05: U Myntri Sorkar bad MLA ka Jowai Bah Wailadmiki Shylla ha ka sngi Saitjain, ula leit jngoh ia ka jingpyntrei ia ki kam ban shna bha ia ka madan Aitnar jong ka Seinraij Ialong ha West Jaintia Hills, hashuwa ban wan ka lehniam Behdeinkhlam ba shisien shisnem.
Ka madan Aitnam ka hap hapoh ka constituency jong u Bah Wailadmiki.
Ha kae ka jingleit jngoh, u Myntri ula shong bishar ia ki jingpynkhreh ban pynthikna ba kane ka madan kan long kaba la khreh bad kaba la biang nadong hadong ban pdiang ia ki riewngeit bad ki nongwan kai sha kane ka jinglehniam.
Haba kren sha ki nongthoh khubor, u Bah Wailad ula ong ba ka Ialong kadei tang kane ka jaka ha ka constituency jong u ka ban dang ban don ia ka madan Aitnar kaba biang nadong hadong kat kum ka juk ba mynta.
“Nga sngewkmen ba da ka jingiapyrshang lang jong baroh ki Rangbah bad ki dkhot ka Seinraij, ngi la lah ban ithuh ia ki skhim ban pynbiang ia kane ka madan” ula ong.
U bynrap badien ka jingkyrpad jong ki Rangbah ka Seinraij bad ki Nongshongshnong ka Ialong, u Symbud Myntri Rangbah Bah Sniawbhalang Dhar ula wan lang ban yrshan ia ka jingpynroi ia kane ka jaka. Nalor ka madan Aitnar, u Bah Wailad u iathuh ba ka Sorkar kala pyntrei ruh ia ka surok bad ka jingkieng ha Ialong, kaba la kylla long ka jaka wankai ki nongjngohkai pyrthei.
U Myntri ula ong ba watla kane ka project kam pat dep pura, kiba bun ki bynta kila heh kila dep bad kane ka madan kan sa biang nadong hadong na ka bynta ka lehniam Behdeinkhlam mynta u snem.
U President ka Seinraij Ialong Bah P Shylla ula ai khublei ia u Symbud Myntri Rangbah Bah Sniawbhalang Dhar bad ia u MLA Bah Wailadmiki namar ka jingkyrshan ban pyntyllun shakhmat ia ka project.
U pyntip ba ka Lehniam Behdeinkhlam jong ka Seinraij Ialong kan long naduh ka 2 tarik Nailar haduh ka 10 tarik Nailar mynta u snem bad khot sngewbha ia ki paidbah na ka jaidbynriew Hynniewtrep ba kin wan bad sakhi ia kane ka jinglehniam.
