Shillong, Jylliew 07: Hadien baka jylla kala sakhi ia ka jingbun palat ki khynnah bad ki samla pule kiba pep skul shiteng namar kiba bun ki daw, ka tnat Pule Puthi ka Sorkar Jylla kala ai jingmut ban pynrung noh iaka Vocational Skill Development naduh klas VIII haduh klas XII.
Haba kren sha ki lad pathai khubor u nongaibuit ka tnat Pule Puhti bah H.M Shangpliang ula ong ba ka sorkar kan wanrah katto katne ki jingpynkylla hapoh ka tnat Pule ka jylla khnang ban ai mynsiem ia kito ki khynnah bad samla kiba pep skul shiteng.
U bah Shangpliang ula ong ba hapoh ka Education Policy, ka sorkar kan pynrung ruh iaka jingpule Vocational Skill Development ka ban sdang naduh klas VIII haduh klas XII bad lyngba kane, kino kino ki bym lah ban bteng iaki jingpule kin ioh ban shah pyntbit ha ki ba bun ki sap ba ki don khnang ba ki lah ban ioh kam ioh jam.
“Lyngba ka Vocational Skill Development, uno uno u samla ne khynnah bym lah ban bteng iaka jingpule un ioh lypa ia ki jinghikai pyntbit ha ki kam bapher bapher bad hadien ba ula lait iaka Eksamin klas X un lah ban ioh kam namar ula ioh lypa ka jingihkai pyntbit hapoh ka skul ba u leit” la ong u bah Shangpliang.
U bah Shangpliang ula iathuh ba shen ka tnat Pule kan sa shong bishar haba iadei bad ka jingduna kiba lait iaka eksamin klas X khnang ban tip, balei duna ka jinglait eksamin bad kumno ban kyntiew iaka tnat pule ha baroh ki liang.
Haba kylli hato ka sorkar ka thmu ne em ban pynduh noh iaka eksamin klas X bad klas XII, u bah Shangpliang ula ong ba haduh mynta ka sorkar jylla kam pat lah ban shim rai halor kane ka phang kaba don ruh hapoh ka National Education Policy (NEP) ka sorkar pdeng.
Ula ong ba shen ka sorkar jylla kan sa shong biang halor kane NEP, kumno ban pyntreikam hapoh ka jylla bad ka sorkar kan shim hi iaka rai ka ban myntoi iaki khun samla pule ka jylla Meghalaya.
