Shillong, Jymmang 09 : Ka Sorkar Jylla shen kan sa iasoi ia ka soskular Memorandum of Understanding (MoU) bad ka Kerela Psychiatric Society ban weng ia ka jingduna ki Psychiatrist bala dep hikai pyntbit hapoh ka Jylla.
Haba pynbna ia kane ha ka sngi Thohdieng, u Myntri ka Tnad Social Welfare Bah Paul Lyngdoh ula ong ba ka Jylla kala mad ia ka jingeh ha ka jingduna ki Psychiatrist kiba la pyntbit ban sumar ia ki nongdih droks ha ki detox centre.
“Kumta, nga kmen ban pyntip sha phi ba ngin sa iasoi noh shen ia ka MoU bad ka Kerela Psychiatric Society ha kaba haduh 72 ngut ki Psychiatrist lah dep ban ithuh bad hadien ba ngi peit ia ka jingdon pisa, ngi dei ban lah ban pyndonkam ia ka jingshakri jong ki katto katne na kine ki Psychiatrist ha ka wat kaba nyngkong” ula ong.
Haba bynrap ia kane, u Director ka DREAM Bah Francis Kharshiing ula ong “Ngi don tang 11 ngut ki Psychiatrist ha ka Jylla bad bun na ki, ki dei kiba don ha Shillong. Ngi don hapdeng ka jingeh. Kane ka dei kawei ka kam kaba ngi lah ban leh eiei”.
Ula ong ba ka Sorkar ka phai khmat ban don kawei ka detox centre ha man ki district ka Jylla. Ia mynta, ki don tang artylli ki detox centre-kawei ka Shillong bad kawei ka Tura.
“Watla ki don bun ki detox centre ba shimet, ngi kham sngewkhia halor ki samla kibym shah khein briew haka imlang sahlang bad kito kiba wan na ki longiing BPL. Hynrei, namar ka jingduna ki Psychiatrist, ngim shym la lah ban plie ia ki detox centre” ula pynpaw.
U Bah Kharshiing ula pyntip ba ula shong jigniakren bad ka Kerela Psyciatric Society ha ka jingleit iuhkjat jong u sha Kerela bad kila pynpaw ia ka jinglong kaba kloi ban ai ia ka jingshakri jong ki hapoh ka Jylla Meghalaya.
 bad ka Kerela Psychiatric Society ban weng ia ka jingduna ki Psychiatrist bala dep hikai pyntbit hapoh ka Jylla.){kind=link}