Shillong, Jymmang 14: Ka Sorkar jylla shen kan sa sdang noh ia ka ‘Tribal Research Department’ ha ka Captain Williamson Sangma State University naka bynta ban pynpaw nam iaka jingrriew spah jong ka Jylla ha ka kolshor bad jingtei kiba rim jong ki paid riewlum ka jylla.
Ia kane la pyntip da u Myntri ka pule puthi u Rakkam A Sangma da kaba ong, “Kane ka skulbah ka lah ban dei kaba nyngkongeh ha ka ri halor kaj ingthmu ka jong ngi ban buh ia ka Tribal Research Department.”
Ula ong, ba ka jingthmu jong katei ka long namar ba ki don bun ki kolshor jong ki riewlum kum ka ktien ka thylliej, ki rukom leh bad ka tem ka put bad ka rwai ka siaw kiba lah ban duhjait noh lada kam don kano kano ka jingwad bniah kaba thikna bad ka jingbuh ryntih ia ki rekod ne ‘Documentation’.
“Lada ia kine baroh ym lah ban buh bha ha ki jingthoh ne rekod, ki lah ban duhjait noh ha ki sngi ban wan. Kumta ngi lah rai balei ba ngin don noh ia ka Tribal Research Department,” ong u Sangma bad ka pyntip ba katei ka state university kan iatreilang bad kiskulbah kiba pawnam ha ka ri bad kumjuh bad kiskulbah kiba donshabar ri ban kyrshan halor katei ka jingpule.
U Rakkam ula ong, “Ki jingthoh ha ki kot bakhuid ne kyntang ki ong, ba ka jingshemphang u briew ka long kaba duna. Ka pyrthei bad ka haw-haw kadei kaba la thaw da u Blei uba donbor tam. Ym don uwei ruh u saïañtis ne u riewstad uba tip lut baroh ia kiei kiei kiba don ha ka pyrthei bad ha ka haw-haw. Kumta ka kolshor jongki rewilum kadei kaba itynnad kaba la thaw da u Blei, kumta kane kadei kawei na ki jingitynnad kaba ngi don. Kadei ka jingkitkhlieh ka jong ngi ban pynim ia ka lem kumta, lada ki briew kim shimkhia kan sa jah noh. Kadei ka jingkyrkhu ia ngi. Ki nong Meghalaya kiba kynthup ia ki Khasi, Jaintia bad Garo bad kiwei kiwei kim khmih lynti ba ki nong America ne ki briew na Mumbai, China, Japan kin leh na ka bynta ka jong ngi. Dei ma phi kiba hap ban leh iaka Research ne ka jingwad bniah mynta.”
“U Rev Thomas Jones, u Kpa jong ki dak thoh Khasi udei uba la ai jingnang jingstad ia ki paidbah hangne, mynta ngim lah ban khmih lynti ban wan biang sa uwei pat u Rev Thomas Jones sha rilum Khasi ban ai jinghikai ia ngi. Kumta kadei ka jingkitkhlieh ka jong ngi bad kadei ka por kaba biang bha mynta ban pynlong ia ka jingwad bniah bad ban buh ha ki jingthoh namar kiba bun ki kolshor jong ki riewlum kila don ha ka khyllipmat ba ki lah ban duhjait noh” la ong u Myntri ka pule puthi.
Ula pyntip ruh ba hadien ba la weng ia ka jingpyntreikam ia ka Model Code of Conduct (MCC) ha ka 4 tarik u Jylliew, yn sa thung noh ia u Vice Chancellor ka Captain Williamson Sangma State University
