Shillong, Rymphang 01: Ka Meghalaya Legislative Assembly, kala buh jingmut ban pyndonkam noh da ka kor Artificial Intelligence (AI) hapoh ka Iingdorbar Thaw Ain ka Jylla.
Ia kane la pyntip da u Lamphang ka Iingdorbar Thaw Ain ka Jylla Thomas Sangma hynne ka sngi Palei haba pyntip ba ka Assembly kala pan ia ka jingiarap na ki Agency bad ki stad ki jhad kiba lah ban ai jingmut bad batai lem kumno ban pyndonkam ia ka AI ha ka Dorbar ban wan ka Jylla.
U Thomas u ong ba kine ki stad ki jhad ki kwah ban ailad ia ki Dkhot ka Iingdorbar ba kin kren dala ki jong ki ktien hapoh ka Dorbar khnang ba kin lah ban peit kumno ka AI ka lah ban iarap ha ka jingpynkylla ktien.
Ula ong, namar ba ka ktien tynrai la ka dei ka ktien Garo ne Khasi-Jaintia, ki dei ki bym pat ithuh kumta la khot ia ki stad ki jhad ba kin ai jingmut bad batai lem ia ki lad ki lynti.
Ki stad ki jhad kin sa wan ban iadonlang ha ka Dorbar Mang tyngka ban wan jong ka Jylla bad sngap bad ban peit ia kaei kaba ki lah ban ai jingmut.
Ha kajuh ka por, u Thomas Sangma u pyntip ba ka jingialang jong ka Business Advisory Committee (BAC) kaba long hynne ka sngi Palei, kala mynjur ban pynlong ia ka Dorbar Mang Tyngka ka Jylla naduh ka 16 tarik Rymphang haduh ka 27 tarik Rymphang.
U pyntip ba ka Committee kala mynjur ban buh lai sngi kum ka sngi iatai ia ki kam ba wanrah da ki dkhot ba shimet shimet (private member business) bad san sngi ban iakren ia ki kam ba wanrah da ka Sorkar. U pyntip ia ka mang tyngka jong ka Jylla yn wanrah ha ka 21 tarik Rymphang.
 hapoh ka Iingdorbar Thaw Ain ka Jylla.){kind=link}