Shillong, Rymphang 16 : U Nongialam ka AITC Dr Mukul Sangma ha ka sngi Thohdieng, ula pyntip ba ka party ka lah ban sei kyrteng tang na Tura Parliamentary constituency ban iakhun ia ka elekshon Lok Sabha ban wan.
U Dr Mukul ula ong ba ki dak ki shin hi ki long ba ka jingiakren ka dang iaid bad kaei kaba paw ka long ba ka lah ban nym seisoh, mynta ka rai ka long ba hato ngin iakhun na baroh ar constituency ne em.
“Hynrei na ka liang jon gngi, ngi la iengskhem ba ngi kwah ban iakhun tang ia kawei ka seat (Tura) bad ailad ia kawei pat ka seat (Shillong) ban iakhun da kiwei ki party” ula ong.
“Ai ba kan don ka jingpyrshang ban wanrah ia ka jingiatreilang namar ka thong jong baroh hi ka long ban iakhun pyrshah ia ka liang synshar (NPP)” ula bynrap.
U Dr Mukul u pyntip ba ia ka rai hi yn sa shim noh ha kine ki khyndiat sngi ne lehse lashai lane hapoh ka sngi Nyngkong, yn sa pynbna noh ia ka kyrteng jong ki kyrtong.
Haba kylli la un mih iakhun hi, u Dr Mukul ula ong “Ngam kwah ban pynduna ia ka jingdon MLA ba 60 ngut hapoh ka Iing Dorbar thaw ain ka Jylla”.
