Shillong, Rymphang 25 : Ka sorkar jylla ka la shimkhia ban pynim biang ia palat 741 tylli ki tyllong um kiba kongsan ha kylleng ka jylla, kiba la tyrkhong namar ka jingktah na ka jingkylla ka suinbneng.
Haba kren sha ki lad pathai khubor, u Myntri ka Tnad Public Health Engineering (PHE) Marcuise N Marak u la ong ba ka jingtyrkhong ki tyllong um ka don ka jingiadei bad ka jingktah na ka jingkylla ka suinbneng.
“Ka jingkylla ka suinbneng kala jia ha man la ki jaka. Dang shen ha ka 18 bad 19 tarik u Rymphang, ngi la shong ka jingialang ba-ar jong ka All India Water Ministers Conference ha Udaipur, hangtei nga la iohsngew na ki Myntri Sorkar na man ki jylla ba ka jingktah kala jia ha baroh ki jaka. Ka dei ka jingktah jong ka jingkylla ka suinbneng. Hooid, ngi la sdang ban shim ia ki lad ki lynti ban pynbeit bad ngin sa ioh ia usoh ha ki khyndiat snem ban wan. Ngi la sdang ban pynim pat ia ki shyngiar bad ki tyllong um kiba la tyrkhong” ula ong.
U Marak ula pyntip ba ka Tnad kala dep ban ithuh dang shen haduh 741 tylli ki tyllong um kiba don jingma bha ban duh noh.
“Hapoh ka jingialam u Myntri Rangbah Conrad K Sangma, ka Meghalaya kala thaw ia ka Climate Council, kaba la shim ia ka rai ba dei ban shim ia ki lad ki lynti ban leh eiei noh (pynim pat) ia kine ki tyllong um” ula ong.
Haba kylli, u MYntri ula ong ba ka jingring tyrkhong ki tyllong um kala ktah bha ruh ia ka jingpyntreikam ia ki project Jal Jeevan Mission (JJM).
“Ha kino kino ki shnong ki bym ioh um ka daw hi ka dei namar ba ki tyllong um kila tyrkhong. Ngi la shimkhia ban leh eiei ia kane” ula ong haba kam ba ka daw ba hakhmat eh halor ka jingtykhong ki tyllong um ka dei namar ka jingrep syrti khamtam eh ha Ri-lum Garo bad katto katne ki bynta ka West Khasi Hills.
Ula iathuh ba ka Sorkar kala ban jur ruh ia ka jingdonkam ban pyllang bad tynkai ia ka umslap hapoh ka Jylla.
“Ngi dang thmu ban leh eiei da kaba pyllang ia ka umslap. Lah ban leh ia ka ha ki arbynta-kawei ka long ban pynshlur ha kaban pyllang ia ka um ha manla ki thliew iing bad kawei pat ka long ban pyndap biang ia ka um hapoh khyndew” bynrap u Marak.
