Shillong, Naiwieng 14 : Baroh ki kali kiba wan rung sha Meghalaya kin hap ban iaid mynta lyngba ka Vehicle Scanning Machine (VSM) kum shibynta na ka jingpynkhlain jong ka Jylla ia ka thma pyrshah droks ban tehlakam ia ka jingwan rung u droks sha Jylla.
Haba pyntip ia kane hadien ka jingialang ka Drugs Reduction Elimination & Action Mission (DREAM) hynne ka sngi Palei, u Myntri ka Tnad Social Welfare Bah Paul Lyngdoh ula pynbna ia ka rai jong ka Sorkar ban pynieng ia ki Vehicle Scanning Machine ha Ri-Bhoi bad East Jaintia Hills District, kiba dei ki artylli ki jaka rung sha ka Jylla Meghalaya, ka ban pyndep hapoh ka hynriew bnai.
“Ngi la iakren ia ka jingdonkam ban pynieng ia ki Vehicle Scanning Machine ha ki Entry Point jong ka Jylla kaba mut ha Ri-Bhoi bad EJH. Ia kine ki machine yn pyndait hapoh ka hynriew bnai. Ka jingpyndait ka donkam ruh ia ki briew kiba la tbit ban pyndonkam ia ki tiar bad ban ioh bat ia kano kano ka kali kaba ishankhmat” ula ong.
Haba kylli, u Myntri ula ong “Ia kine ki screening vehicle yn pynieng ha baroh ki entry point ban talasi ia ki kali. Baroh ki kali kin hap iaid lyngba ki screening machine”.
U Bah Paul ula pyntip ruh ba ka jingialang kala rai ruh ban nang pynkhlaun shuh shuh ia ka Anti Narcotics Task Force (ANTF) ban iakhun pyrshah ia ka kam khaii droks hapoh ka Jylla.
“Ngi la bthah ia ka DP ba kan pynkhreh ia ka jingtyrwa halor ka jingdonkam briew kiba lah ban buh beit thik sha ka ANTF khnang ba kan nang pynkhlain ia ka jingtreikam ha ka jingiakhun pyrshah ia ka kam khaoo droks” ula ong haba bynrap “Ka jingkhaii droks, kaba dei ka jingma ba khraw bha ia ka Jylla namar ka jingiajan ia ka iew droks, kaba dei ka Myanmar nalor ba ka Jylla ka don ia ka lynti iaid kaba jrong na kawei ka Jylla sha kawei pat kata naduh Ri-Bhoi sha EJH”.
Ha kajuh ka por, u Myntri ula ong ba iaka Meghalaya Police Act, 2010, yn sa pynkylla noh khnang ban lah pynbiang ia ki jingdonkam jong ki Volunteer, kiba dei shibynta jong ka Village Defence Party (VDP).
“Ka jingdon ki VDP volunteer ruh la dep buh ba kan long 15 ngut kawei ka party khnang ban pynthikna ba ha ki jaka kiba kham duna briew, ngin dup lah ban ioh ia ki briew ba donkam” ula ong haba pyntip ba la shim ruh ia ka sienjam ha kaban pynkiew noh ia ka jingsiew ia ki VDP volunteer.
Halor ka jingwanrah ia ki Fast Track Courts, u Bah Paul ula ong “Ngi la rai ruh ba ka don ka jingud jingnam na ki paidbah halor ka jingiaid slem palat ki mukotduma kaba la ktah ruh ia ki nongmudui bad ki nongai sakhi…kumta ka Sorkar Jylla kan sa thoh lyngba u Myntri Rangbah ka Jylla bad ruh ban iakren bad u Chief Justice ka High Court ka Jylla khnang ban lah pynsted noh ha kaban pynkha ia ki fast track court, ki ban tian bishar ia ki mukotduma manla ka sngi”.
Haba kylli ia ki jingdawa jong ki kynhun Sengbhalang, u Myntri ula ong ba ka Sorkar kan leh iala ka jong ka kamram hynrei kan nym leh ia kano kano ka kam hapdeng ka jingshah pynbor.
U Bah Paul ula kubur ruh ia ka jingkongsan ban iasam ia ki jingtip bad kiwei pat ki Jylla NE bad ong “La dep bthah ia ka DG ba kan leh eiei halor kane ka bynta”.
 kum shibynta na ka jingpynkhlain jong ka Jylla ia ka thma pyrshah droks ban tehlakam ia ka jingwan rung u droks sha Jylla.){kind=link}