Shillong ,Iaiong 08: U Myntri Rangbah ka jylla Conrad K Sangma hynne ka sngi baar, ula ong, ba watla kala don ka jingkiew ha ka jingshah kem ki nongkhaii droks bad ka jinghiar ha ka jingdon ki briew kiba dih droks, hynrei um pat sngewhun ia u soh ba mih namar ba ka sorkar ka kwah ban pynlong ia ka jylla Meghalaya kaba lait na u droks.
“Ka jingdon jong ki nongpyndonkam ia u droks kala hiar bha. Ngam sngewkmen na katei ka resol kaba la mih. Ki dang bun kiei kiei kiba ngi dang hap ban leh. Ngi kwah ban lait syndon noh na u droks. Ngi lah shim ia ka kum ka thma pyrshah ia u droks, kumta ngi hap ban trei shitom shuh shuh” ong u Conrad haba iakren bad ki nongthoh khubor.
“Ngi lah iohi ba kala don ka jingkiew ha ka jingkhaii bad dei na kane ka daw ba bun kila shah kem bad ki pulit kila don ia ka tnad syntiat kaba khlain bha. Ngi lah iohi ba ka jinglong jingman baroh kawei kala nang wandur hynrei ngi dang hap ban iaid ha ka lynti kaba jrong bad ki don bun ki jingeh bad ki jingtynjuh kiba ngi la mad” ula ong.
Haba pynpaw ba ka Sorkar kala bhah tyngka ha kine ki snem kiba la dep ban iakhun ia u droks, u Conrad ula ong, ka sorkar kala thaw ia ka Task Force kaba la trei shitrhem ban ratdyngkhong ia ka kam khaii ia u droks ha ka Jylla.
U Myntri Rangbah ula pynkynriah noh ia ka jingialang jong ka Drug Reduction Elimination & Action Mission (DREAM) kaba dei ban long hynne ka sngi Baar bad ula ong ba ia katei ka jingialang yn sa pynlong noh hadien jong ka ‘Easter’ ne ban rakhe ia ka jingmih pat jong u Trai Jisu Khrist”.
“Ka don ka rukom khaii, kaba dei ban buddien bha bad ki don ruh ki nongdih droks kiba donkam ban buh ha ki jaka ai jingsumar bad ban ioh ia ka jingiasyllok, kumta ia kitei kiei kiei baroh ki donkam ia ka jingtuklar kiba bun bad kane ka DREAM kadei kaba la pynlah ia ngi ban ia wanlang” ula ong.
Ha kaba iadei bad ka jingkyntu u Myntri Rangbah ka Assam u Himanta Biswa Sarma ia ka jingdonkam ban don ka jingiatreilang hapdeng ki jylla ban tehlakam ia u droks, u Conrad Sangma ula ong, “Katei ka jingkhot da u Myntri Rangbah ka Assam ka long kaba dei bha. Ngi baroh ngi donkam ban iatreilang namar ba ka don ka jingioh ia ki jingtip halor ka jingiasoh bad ki jylla bapher bapher, kaba donkam ban don ia ka jingiatreilang bad katei baroh kala sdang ban jia mynta bad kan sa jia ruh ha ki snem ban dang wan ban don noh ia ka jingiatreilang kaba janai bha “.
