Khot sngewbha ka Olympique Lyonnais Academy ban ai jinghikai pyntbit
Shillong, Iaiong 8: U Myntri Rangbah ka jylla u Conrad K Sangma ha ka sngi ba-ar, u la pynkup burom ia ka kynhun ialehkai football U-17 ka Mynken Christian Higher Secondary School, Ri-Bhoi District, hadien ba kala ioh ia ka kyrdan ba lai ha ka lympung 2nd Indo-French Football Tournament kaba la long ha Paris, France.
Ka kynhun ialehkai U-17 ka skul Mynken Christian Higher Secondary School kaba wan ba-ar ha ka Subroto Cup, kala leit mihkhmat ia ka ri India na Jylla Meghalaya sha kane ka lympung ialehkai kaba long ha Ri France.
U Myntri Rangbah u la ong ba ka kynhun ka la pyni ia ka jingtbit kaba kyrpang, ka jingkut jingmut, bad ka jinglah ban lehkai bha ha baroh kawei ka jingialehkai bad kane ka long shisha ka jingsngew sarong ba ka mih khmat ia ka ri India sha Paris.
Shuh shuh u Myntri Rangbah u la ong ba ka sorkar kan kyrshan pura ha ka jingiaid lynti ka jong kane ka Kynhun.
U Conrad K Sangma u la ong ba ka jingbei tyngka ba ₹50 Lakhs ha ka leit ka wan kam dei tang ka jingpynlut hynrei ka dei ka jingthmu ba thymmai ban pynjanai shuh shuh ia ka jingpynkhreh ha ki kyrdan bapher bapher.
Shuh shuh u la pyntip ba ka Olympique Lyonnais Academy kaba dei kawei ka Academy ba pawnam bha ha Europe kala khot sngebha ia ka kynhun Meghalaya State Football Team (U-18) ba kin wan sha ka jingai jinghikai pyntbit ba 20 sngi ha ka Academy jong ki ha France, ha u bnai Jylliew 2025.
