Thma pyrshah droks | Dawa ka NEIPF ban pyntrei ia ki lynti pyrrkhing ba tyngeh kynthup ka Anti-Narcotics Battalion

Shillong, Nailur 17 : Ka North East Indigenous People’s Forum (NEIPF) Meghalaya Chapter, kala dawa ia ka Sorkar Jylla ban pyntrei ia ki lynti pyrrkhing ba tyngeh kynthup ka jingpynkha ia ka Anti-Narcotics Battalion, ha ka ban iakhun pyrshah ia u droks hapoh ka Jylla.

Ha ka dorkhas bala aiti sha u Symbud Myntri kam Pohiing (Police) Bah Prestone Tynsong ha ka sngi Balang, u Chairman ka NEIPF Bah Wellbirth Rani bad Secretary Bah Sadon Blah uba dei ruh u President ka HNYF, kila ong “Ka jingnang jyllei u droks bad ki kam bymman ka dei ka kam kaba sngewkhia bha kaba buh jingma ia ka jingshngain jong ki nongshongshnong jong ngi. Ka dawa kyrkieh ban pyntreikam ia ki lynti pyrrkhing kiba tyngeh ban tehlakam ia kane ka jingeh hashuwa ban dier ka por”.

“La bun snem, ngi la sakhi ba kumno ki ri kum ka Philippines ka shah ktah jur namar u droks. Ki bor pyniaid ka Philippines ki hap ban pynkhlain ia ka jingiakhun pyrshah ia u droks lane ka thma pyrshah droks ha ka por ba synshar u President barim Rodrigo Duterte, kaba lam sha ka jingpyniap klep. Mynta ka jingkylli ka mih, hato ngi lah ban ailad ia ki jingjia ha Meghalaya ba kin poi ha u pud ba ym lah leh eiei shuh kumba jia ha Philippines, haduh ba hap pyntreikam ia ka hukum ban shu siat kat haba iohi ia ki nongdie/nongdih droks khnang ban pynduna ia ka jingwan rung u droks?. Em ngim kwah ia kata, bad kum kane ka jinglong jingman ka dei ka bym kwah satia ba kan jia. Ngim lah ban ailad ia ka jingpyniap klep ba kin jia ha ka Jylla jong ngi kumba jia ha ka por ba jur ki kam kaikhlaw ha kaba ki suba nongsyntiat ki shu shah pynshitom bein bad shah pyniap. Ka jingim jong man ki nongshongshnong bad ki samla jong ngi ki long kiba kordor. Ki samla ki dei ka lawei ka Jylla, ngi dei ban shimkhia lang ban pyllait ia ki na ka jingshahteh ha ki jingmlien ba sniew” ong kine ki nongialam ka NEIPF.

Ka dorkhas kala buh ruh ia ki katto katne ki jingai jingmut ba ka Sorkar kan pyrkhat bad leh eiei noh.

Ka NEIPF kala dawa ia ka Sorkar ban pynkhlain ia ki lad syntiat khnang ban iohkem ia ki nongleit jingleit hapdeng ki Jylla kiba donkti ban kit bad khaii ia u droks bad ban pyndkut noh ia ka jingwan rung u droks.

Kala dawa ruh ban pynkha noh ia ka Anti-Narcotics Battalion hapoh ka Tnad Meghalaya Police, ka ban pynleit jingmut kyrang tang ha ka jingiakhun thma ka Jylla pyrshah ia u droks.

“Ka NEIPF kala iaroh ba ka Sorkar Jylla kala thaw ia ka Anti-Narcotics Task Force ban iakhun pyrshah ia ka kam droks. Hynrei ka sngew donkam pat ba ka Tnad Meghalaya Police kan thaw noh da ka Anti-Narcotics Battalion ba kyrpang, ka ban pynleit jingmut beit thik tang ha ka thma pyrshah droks ka Jylla ka ban long naduh ka jingkurup ia u droks haduh ka jingkem ia ki nongkhaii bad ka jingtohkit ka ban sei madan bad ratdyngkong ia ka network jong ki nongkhaii droks bar it baria bad ki kingpin. Ia mynta, ka Meghalaya Police ka khmih lut ia baroh, ka trei ia bun ki kam naduh ka jingkhmih ia ka shongsuk shongsain haduh ka jingkthong ia ki nongleh kam sniew nalor kiwei kiwei ki kam” ong ka Forum.

Nalor kane, ka NEIPF kala ban jur ia ka jingdonkam ban shah ia ki Dorbar Shnong ba kin thaw ia ki Vigilante Committee ki ban tehlakam ia ki nongdih droks ba kin leh ia ki kam bymman bad ban pyntip ruh sha ki bor ka ain lada don kino kino ki kam ba ishankhmat.

Kala ai jingmut ruh ban nang pynbun ia ki rehabilitation cehtre bad ban ai ia ki vocational training program ia ki nongdih droks bala ioh jingpynkoit, ka ban iarap ia ki ban wan imlang biang ha ka imlang sahlang nalor ban weng noh ia u sohkhliang ba idei bad ka jingdih droks nalor ban pynshlur ia ki longiing longsen ba kan pan jingiarap na ka bynta ki jingsumar.

“Ka long kaba donkam ban tip ba ka Meghalaya kam pat don ki rehabilitation centre ha kylleng ka jylla, watla ka la shah ktah ha ka jingeh jong u drok ha kiba bun ki longïing ha ki district bapher bapher jong ka jylla. Kumta, ka jingbuh ia ki rehabilitation centre ka dei kaba hap ban pynbun kat kum ka jingdonkam khnangban lah ai ia ki jingsumar kiba biang, jingiasyllok bad ka jingpyniasoh biang ha ka imlang sahlang” ong ka Forum.