Imphal, Jylliew 06 : Ka kynhun ki runar hynnin ka miet sngi Palei, kila wiang ding ia ka iingsah jong u Myntri Khynnah ka Sorkar Pdeng ba khmih ia ki kam korbar bar-ri u RK Ranjan Singh, kaba don ha Kongba-Nandeiban Leikai, jong ka Imphal East.
Kane ka jingjia kala jia tang hadien shisngi ba shah wiang ding ka iingsah u Myntri Nemcha Kipgen kaba don ha Imphal, kaba la jia ha ka sngi Balang.
Kat kum ka khubor, kane ka jingjia la pyntip ba kala jia ha ka por 11 baje mynmiet ha kaba ka kynhun ki runar kila leit ban hiar thma ia ka iingsah u RK Ranjan Singh bad wiang ding shisyndon ia ka.
Ki Heh Pulit ki pyntip ba ia kane ka kam thombor la leh da ki briew kiba don kumba 1200 ngut eiei ba kynthup bad shynrang bad kynthei.
Ia kane ka jingjia la lah ban tehlakam da ka jingwan poi noh ki bor pahara bad ki kali pynlip ding, kiba la lah ban tem ia ka ding shuwa ba kan bam iingkhong khait ia ka Iing.
Ban pynsaphriang ia kine ki briew, ki Pulit ka Imphal East kila hap ban siat da ki tynsong lyer pynsat khmat.
La iathuh ba ha kane ka por ba jia kane ka jingjia, u RK Ranjan Singh bad ki bahaiing hasem jong u, kim shym la don satia hala iing.
Ki Pulit ki iathuh ba sa artylli ki Iing kiba dei jong ki trai shnong, kila shah wiang ding ha sor Imphal bad ha kane ka jingjia, kala mih ruh ka jingiapyni bor hapdeng ki Rapid Action Force ka Manipur bad ki paidbhur. Kane kala jia hynnin ka janmiet.
Ka Iingsah u Myntri Khynnah ka Sorkar Pdeng RK Ranjan Singh ka dei kaba la shah hiar thma teng ha ki hajar ngut ki briew myn ha ka 25 tarik Jymmang, hynrei ki bor pahara kila lah ban iada ia kane ka Iing bad beh krad lut ia baroh ki briew.
Ki Pulit ki iathuh ba kine ki paidbhur ba kynthup ia ki shynrang bad kynthei, kila dawa ban pynbeit noh kham kloi ia kane ka jingiakynad hapdeng ki jaidbynriew Meitei bad ki Kuki.
Ki paidbah kila kynnoh ia baroh ki MLA bad ki Myntri Sorkar ka Jylla ba kim shym la leh eiei ban pynkut noh ia kane ka jinglong jingman ha Manipur.
Pule lang ia kane: Lynshop ka erїong ha shnong Mawrok julor ki їing ki sem bad ki jingthung jingtep
