Yn ai pisa ka Sorkar ia ki seng niam ban ialap pyrshah ia u droks
Shillong, Rymphang 20 : Ka Sorkar Jylla kala shim mynta ia ki sienjam kiba tyngeh ban iakhun ia ka thma pyrshah ia u droks ha Jylla bad kala sdang ban pyndonkam ia ki ksew sma bad ki kali talasi (scanner vehicle) ha baroh ki jaka rung bad jaka mih ka Jylla nalor ka jingpyntreikam ia ka ain ba tyngeh.
Kum ka jingpyrshang ban pynthikna ha kaban ioh ia ki lad jingsumar, jingpynkoit bad tehlakam ia ki jing nang kiew ka jingdih drok bad jingdih buaid, ki Pulit ka Jylla ki la iatreilang bad ki seng niam ban pynphriang ia ka jingtip halor ki jingma jong u droks.
Na ka bynta kane, la pynlong ïa ka jingïalang hapdeng ki nongïalam niam bad ki heh sorkar mynta ka sngi Palei ha State Convention Centre, ha kaba la ïakren halor ki sienjam ba donkam ban shim bad ki lad ki lynti ban weng ïa ki jingeh.
Ha ka jingialang la iarai ba ki kynhun seng niam kin iatreilang bad ki Pulit ban ithuh ia ki jaka kaba jyllei eh ka jingdih droks bad ban shim ia ki sienjam ha kaban tehlakam ia ka.
Yn pynlong ia ki prokram pynsngewthuh, ki jingialang ai jinghikai, bad ki jingai jingmut ia ki samla shaphang ki jingma jong u drok.
Ki briew kiba donkam ban pynbha pat yn phah sha ki jaka pynkhuid met (detox centre), bad ka jingai jingiarap jong ka sorkar kaba ₹32,000 kan don na ka bynta kito kiba wad jingsumar shabar jong ka jylla.
Yn pynlong ruh ia ki jingai jingmut bad ki jinghikai pyntbit ia ki sap ban iarap ia ki nongdih drok bala sangeh dih, ba kin tei pat ia ka jingim jong ki.
F.G. U bah Kharshiing, Mission Director ka Drug Reduction, Elimination, and Action Mission (DREAM) u la ong ba ki nongialam niam ki don ka bynta kaba kongsan ban pynsaphriang ia ka jingtip bad btin lynti ia ki paidbah ha ka jingiakhun pyrshah ia ka jingdih drok.
La mang ia ka pisa ba nyngkong kaba T.50 lak ban pyniadon bynta ia ki Balang ha kaban tehlakam lang ia kane ka jingeh.
Ki Balang kiba kwah ban iashim bynta ha kane ka jingthmu ki dei ban aiti ia ki jingtyrwa kiba batai ia ki jingthmu jong ki. Ia kine ki jingtyrwa yn sa bishar bniah shwa ban ai kano kano ka pisa.
U Myntri ka tnad Social Welfare Bah Paul Lyngdoh ula ong ba ka Sorkar Jylla kala pynlong ia ka jingiakren bad ki kynhun bapher bapher ban iakhun ia kane ka jingeh. Ula pyntip ruh ba ka Sorkar kala thaw ia ka Anti-Narcotics Task Force (ANTF) ba 40 ngut ki dkhot, ka ban pynleit jingmut beit thih ia ka jingtreikam tang ha ki kam ba iadei bad u droks.
“Ka Jylla Meghalaya ka la wanrah ruh ïa ki aiñ kiba kham pyrkhing ban set ïa ki nongleh bymman ba la kem bunsien, bad saw ngut ki briew ki la dep shah set phatok hapoh kine ki kyndon thymmai. La pynbiang ruh ia ka jaka na ka bynta ban tei ia ka Rehabilitation Centre ba thymmai bad ka Sorkar kan sa ai ia ka pisa ba kin pyntreikam” ula pyntip.
U Bah Paul u pyntipa ka Sorkar kala nang pynkhlain ruh ia ka jingkem droks ha ki jaka rung bad jaka mih ha Jylla da kaba pyntreikam ia ki Scanner Vehicle bad ki ksew sma.
Ula pyntip ruh ba ka Sorkar kala pynim biang ia ki Village Defence Party (VDP) ban pynkhlain ia ka jingtreikam jong ki Dorbar Shnong ha ka jingiakhun pyrshah ia u droks.
“Ka Sorkar kala pynkiew ia ka jingsiew ba man u bnai sha ki dkhot VDP na ka T.800 sha kaT.3000 nalor ki tiar kiba kham bha” ula ong.
