Shillong, Rymphang 20 : U Myntri ki kam jngoh kai Bah Paul Lyngdoh ha ka sngi Palei ula ong ba ka jingpyntrei ia ki project bapher bapher ba shongdor haduh T.4000 klur kan dei ka kam ban wanrah ia ka jingkylla kaba khraw ia ki kam jngohkai pyrthei ka Meghalaya.
Haba iakren bad ki nongthoh khubor, u Bah Paul ula ong ba ki project ki kynthup bun eh sha ki jingtei.
“Kumjuh ruh ka jingkynshew kaba bun kala iaid sha ki jaka jngohkai ba khring bha kynthup ia ka Umiam, Sohra, New Shillong, Dawki bad ha Ri-lum Garo” ula bynrap.
U Myntri u iathuh ba ka pisa ba kot haduh T.4000 klur ka dei kaba la iakhleh lang ia ki project ba bei da ka Sorkar Jylla, ka jingbei ba 90:10 na ka Ministry of Tourism bad katto katne na ki Externally Aided Project (EAP).
“Ngi donkam 2 snem ban pyndeo ia baroh kine ki project bad katto katne na ki namar ka aiom treikam ha Meghalaya, ki lah ban shimpor palat ia kawei ka snem mang tyngka” ula ong.
Haba kylli, u Bah Paul ula ong “Kine kin dei ki kam ki ban wanrah ia ka jingkylla kaba khraw. Kum ka nuksa, ka Dawki. Ka dei kawei na ki jaka ba iatur bha ia ki nongleit kai haba phai sha ki kam jngohkai bad ka khaii pateng hynrei haduh mynta ngim don satia ia ki Iing basa kiba biang kumta shisien ba ngi la pynbiang ia ki iingbasa ha kum kine ki jaka, ki briew kin kwah ban sah bad pynlut kham bun ka por bad da ka jingpynheh jong ka surok highway sha ka 4-lane, kan nang pynkhlain shuh ia ka kam jngohkai bad ka khaii pateng”.
