Ther u Myntri ia ka MGSPHSVA | Don eiei ha lyndet ba kwah pynslem ban pynkynriah ia ki dukan madan na Khyndailad

Shillong Naitung 01: U Nongaiktien ka sorkar MDA bad Myntri Bah Paul Lyngdoh hynne ka sngi Ba-ar ula kynthoh tyngeh ia ka Meghalaya and Greater Shillong Progressive Hawkers and Street Vendors Association (MGSPHSVA) da kaba kynnoh ba ka don eiei kaba ka buhrieh sha lyndet ban pynslem khnang ia ka jingthmu ban pynkynriah ia ki nongshong dukan madan sha ka bynta kaba shapoh jong ka Parking Lot ka MUDA, kaba la dep ban pynbna kum ka jaka die jingdie.

U Bah Paul Lyngdoh ula kren ia kane, kadei hadien ba ka MGSPHSVA kala pynlong ia ka jingiakhih ban pyrshah jur ia ka jingkyndang be-ain ia ki nongshong die madan ha ka thain Khyndailad.

“Kumta, ka i kumba ka don eiei kaba buhrieh sha lyndet da ki katto katne ki nongialam. Ngan ym kynnoh lut ia baroh ki nongshong die madan hynrei tang ia ki katto katne ki nongialam ki bym kwah ba yn lah ban pynbeit noh ia kane ka mat. Hynrei sa shisien, nga pynpaw hangne ba ka sorkar ka iengskhem ban pynthikna ia ka jingdon ia ka ain” ong u Bah Paul Lyngdoh haba iakren bad ki nongthoh khubor.

Ula byrngem ba ka sorkar kan ym ailad ban iapein ia ka ain ka kanun, da kaba ai nuksa ba ka jingwan tur ki nongdie madan hakhmat jong ka secretariat, kadei ka jingpynkhein ia ka kyndon163 jongka BNS.

U Bah Paul ula ong ba ka sorkar kala iai shah da ka ba pynjlan ia ka jingai por na ka bynta ban pynkynriah ia ki nongshong bad ki nongdie dukan madan shaduh ka 22 tarik u Naitung bad kala ai ruh ia ki jingkyrshan ia kito kiba la mynjur ban shah pynkynriah noh.

“Ka sorkar kala dep ban bhah ia ka T.10,000 ia man la iwei pa iwei ki nongdie dukan madan kum ka jingai ia ka Shifting Allowance ne ka jingshah pynkynriah bad yn ai ruh ia ka jingkyrshan pisa kaba man la ka bnai kaba T. 2000 ia man la iwei pa iwei ki nongdie madan na ka bynta 5 bnai kum ka jingiarap ia ki na ka bynta ka jingshah pynkynriah sha kawei pat ka jaka ban shong die jingdie”.

Ula banjur ba ka sorkar kala iaid ha ka lynti kaba dei bad kala shimkhia bad shim ia ka jingkitkhlieh ha ka rukom treikam ka jongka ban pynkylluid ia ka sor Shillong bad ia ki jaka iaid ki paidbah.

Ula pynpaw ruh ia ka jingkongsan ha kaban pynioh lang ia ka hok na ka bynta baroh kiba pyndonkam ia ka surok kaba kynthup ia ki nongniah thuk thuk, ki nongiaid kjat bad ki nongdie jingdie bad ula pynpaw ba ka sorkar ka iengskhem ba kan ym pynduh ia ka hok jong kawei ka kynhun ban pynioh nong ia kawei pat.

“Nga lah iai kren ia kajuh shi kajuh ba baroh kiba pyndonkam ia ka surok ki don lang ia ka hok bad ia ka hok jong ki nongdie jingdie kam dei pat ban mut ba kan pynduh noh ia ka hok jong kiwei pat kiba pyndonkam baroh ia ka surok. Ngi don ia ki paid kiba iaid da ka kjat kiba dei ruh kiba pyndonkam ia ka surok. Ngim lah ban pynduh noh ia ka hok ka jongki da kaba pyndonkam ia ka bynta ka jongki tang na ka bynta ban ai jingmyntoi ia ki katto katne kiba pyndonkam ia ka surok.”

U Myntri Sorkar ula pyntip ba ka jingiakren kala iaid naduh ki snem kiba la dep ha kaba iadei bad ka Town Vending Committee bad ba ia katei ka jingialang la buh ruh ia ka rekod kaba man la ki minit bad baroh ki kynhun kiba la mynjur ia ki kyndon jingbthah.

“Kane kam don eiei, ba ka sorkar kala leh hak dak ha ka khyllipmat. Ngil ah don ia ka jingiakren bad baroh ki nongdie madan bad wat bad ki nongialam kiba ha khlieh kiba la wan iashimbynta ha ki jingialang bapher kaba la pynlong na ka por sha ka por” bad ula bynrap “Ia ka jingialang la rekod man la ka minit bad kila mynjur ia ki kyndon jingbthah. Lada phi lah ban leit sha u CEO ka SMB, yn sa ai lut ia phi ia ki jingtip ha kaba iadei bad ka jingiakren hapoh ka jingialang jong ka TVC”.

Ha kaba iadei bad ka jingpynlong ia ka jingkyndang kaba dang shen, u Bah Paul Lyngdoh ula ong ba ka long kaei kaei kaba ym sngewtynnad namar ba ki ophisar ki lah dep ban kren da kaba shai ba tang kito kiba don ia ki Certificates of Vending (CoV) kin lah ban bteng ia ka kam khaii pateng ka jongki.