Shillong, Rymphang 16 : U Nongialam ka Liang Pyrshah Mukul Sangma ula kyrpad ia ka Iingkashari ba kan shimkhia halor ka jingbthei ka par dewiong dang shen ha Mynsngat-Thangsko bad pynthikna ba man ki kam beain dei ban phiah la ka jong bad bishar la ka jong ha Iingkashari khnang ba kan plie lynti ia ka jingtohkit ba laitluid.
“Ka jingpynslem ia ka jingbishar ka hok ka dei ka jingpynduh ia ka hok, nga khmih lynti bad nga dang don ka jingkyrmen ha ka jingstad jong ka Iingkashari ba kan shimkhia ia kane bad shim ia ka lynti ha kaban shim rai ka ban don ka jingpynsangeh noh mardor. Kane ka dei kaba donkam bad ban shah ia ka jingtohkit ba laitluid” ong u Mukul.
Ula ban jur ba man ki khep ba leh beain, kynthup ka jingbthei ka par dewiong, dei ban phiah la ka jong bad ban bishar ruh la ka jong ha Iingkashari. “Man ki kam ba leh beain ba kum kane ka jingheh, dei ban phiah la ka jong bad ban bishar la ka jong ha Iingkashari. Lem kumta, sa kawei pat ka kam beain kan sa mih bad kan ym don jingkut satia”.
U Mukul ula kynnoh ba ka Sorkar ka don ia ka plan ba sha lyndet ban shah ia ki kam beain ba kin bteng, haba ai nuksa ia ka interim report ba 35 jong ka Justice Katakey Committee, kaba pyni ia ka jingjur ki kam tih dewiong beain.
“Lada phi kwah ban pynkut ia kane ka jingleh beain, kane ka Sorkar kan hap ban leit. Katba phi dang shah ia kane ka Sorkar, ki kam beain kin dang bteng beit, kynmaw ia kane ka kyntien jong nga” ong u Mukul haba bynrap baka jingiai kyntait jong u Myntri Rangbah halor kane ka kam hapoh ka Iingdorbar ka dei ka kam kaba sngewkhia bha.
U Mukul ula pyntip ba un sa wanrah da ka resolution pyrshah ia ki kam tih dewiong beain wat hapdeng ka jingtip bha ba kane ka kam ka long subjudice, ba ka dang don hapdeng ka jingbishar hapoh ka Iingkashari.
“Ngan sa wanrah ia kane ka resolutionha ka Iingdorbar watla nga tip bha ba ka rule kam shah ia nga” ong u Mukul haba kdew ba kane ka kam ka long sub judice.
