Shillong, Jylliew 05 : U Myntri Sorkar bad MLA ka UDP ka West Shillong Bah Paul Lyngdoh hynne ka sngi Nyngkong, ula ther ia u President ka ka Voice of the People Party (VPP) Bah Ardent M Basaiawmoit haba kynnoh ym tang ba ka leh politics hynrei ban ber bih ia ka jingsngew iapher jaidbynriew bad pynkhihwin ia ka imlang sahlang halor ka Reservation Policy bad Roster System.
Une u Nongialam ka UDP ula ong ruh ba ka Reservation Policy kam dei satia ka ishu kaba hakhmat eh kaba ktah ia ka Jaidbynriew Khasi mynta.
“Ngam ong ba ka (Reservation Policy) kam dei kaba donkam. Kaei kaba nga ong ka ong ba phi donkam ban buh ia kino kiba kham kongsan hakhmat. Kam dei satia ka ishu ba kongsan eh ba ngi mad (kum ki paid riewlum). Ngi lah kdew ruh ha ka party manifesto” ong u Bah Paul haba iakren bad ki nongthoh khubor.
Haba pynpaw ba ka Sorkar MDA kala dep thaw ia ka Expert Committee ban shong bishar ia ka Reservation Policy, une u MLA ka West Shillong ula ong “Ka jingialang ki seng sain pyrthei ka dei ka kam kaba bteng bad ngin sa wanrah ia ka lynti kaba biang eh ban pynbeit”.
“Hynrei haba phi khmih ia ka na kiba bun ki liang, ka jingbym iohkam iohjam ka dei ka ishu kaba kongsan eh ha Meghalaya bad kam dei satia tang ka jingbym iohkam iohjam, hynrei ka don ruh ka ishu ba ngim lah ban ioh kam (unemployability) namar ba ngim biang ban trei ha kine ki kam” ong u Bah Paul.
U Bah Paul ula ong ba dei ban kylli balei ha ka eksam ka USPC, ka Mizoram ka ioh 4 katba ka Meghalaya ka ioh tang 1 kata ruh ki briew na kiwei pat ki jaidbynriew haba ban jur “La ngin sei ia ki briew ki ban kiew sha ki kyrdan ba hakhlieh duh jong ka bor treikam lane ngi kwah pynmih tang ki peon. Kane ka shong ha phi”.
Une u Nongialam ka UDP ula ban jur ba ka jingbishar thymmai ia ka State Reservation Policy kan nym iarap satia ha kaban weng ia ka jingeh ha ka jingbym iohkam iohjam bad ong “Da lei lei ruh em. Ki don haduh 500 tylli ki kam kiba lait haph ka Sorkar bad ki PSU ha ka shisnem bad kine ki dei ki tnad ba dang ring sdot ha ka iohkam iohjam”.
Ula kdew ruh ba arsnem shuwa ban kut ka quarter ba nyngkong jong ka spah snem ba 21, ka Jylla Meghalaya ka dei ban iakren kham bun eh halor kiwei pat ki lad treikam kum ka kam jngohkai, thain jingthain, kam jngohkai ha ki shnong nong kyndong, ki project ba iarap pisa da ka Sorkar bad kiwei kiwei.
Haba pynpaw ba ka jingpynman kongsan ia ki kam hangne ka long kaba bakla bha, u Bah Paul ula ong ba ka ishu kaba ktah bha ia ka imlang sahlang ka dei ka jingngop ha ki jingdih droks, ka jingbun ki Kmie khlem lok, ka jingduna ki khynnah ban ioh jingbam tei met, ka jingiap ki khunlung ba dang lah bad ka jingbym don jaka puta.
“Kine ki dei ki ishu kiba ktah ia ngi hynrei kim khring ia ki paidbah namar kim don satia ia ki nongkynshoit ban don ka mynsiem iashun bad kawei ba kim dei ki riew sain pyrthei bad ta ka daw kim paw satia kum ki ishu” ula bynrap.
Une u Nongialam ka UDP ula kynnoh ba ka VPP ym tang ba ka leh politics ia ka ishu jong ka Reservation Policy hynrei kala ber bih ban iashun jaidbynriew bad ruh ban pynlamwir ia ka imlang sahlang.
Haba niew ia ka jingiakhih ka VPP kum ka jingle politics, ula ong “Phim dei ban sngew lyngngoh haba ki seng sain pyrthei ki leh politics hynrei u dei ban don da u pud. Ngi hap ban batai ia uta u pud. Ngim lah ban shu pynbiej ia u paidbah”.
Ha kajuh ka por, u bah Paul ula kyntu ia ka VPP ban thung ia u/ka nongiasaid ain ba tip ia ka riti synshar ka ri, u ban iarap ia ka (VPP) ban batai halor ka Riti Synshar ka Ri haba dawa bishar thymmai ia ka Reservation Policy.
U Bah Paul ula pynpaw ia ka jingsngewnguh ia ka Khasi Students Union (KSU) kaba la ai jingmut ia ka jingdonkam ban thaw ia ka Expert Committee ban shong bishar biang ia ka Reservation Policy
