Shillong, Nailar 29 : U President ka Voice of the People Party (VPP) bad MLA ka Nongkrem Bah Ardent M Basaiawmoit ha ka sngi Palei, ula ther ia ki katto katne ngut ki MLA na kiwei ki seng sain pyrthei halor ka jing kynnoh sniew pyrshah ia ka party.
Haba wanrah ia ka call attention hapoh ka Iingdorbar halor ka jingkynnoh thungkam bahaiing ne briew ba don jingiadei ha MPSC, u Bah Ardent ula ong ba ka VPP kala kren ia ka kam bhah kam ym ban pynbiej lane ialam bakla ia ki nongwadkam kumba la mut sniew da ki katto katne ki dkhot ka Iingdorbar.
“Ngim ju leh ia kum kane ka kam sain pyrthei” ula ong.
“Nga sngew thamula ba katto katne na ki MLA, kiba la shu pynleit jingmut tang sha ka VPP. Nga sngew ba ki dei ban pdiang ia ka jingshah rem bad ka rai u paidbah. Ka jingiai mut sniew jong ki ia ngi ka dei ka jingkhein poh ia ka jingstad u paidbah (kiba la jied ia ka party ha ka elekshon Lok Sabha)” ula ong haba bynrap “U MP, uba jop na ka party jong ngi um dei satia tang u MP ka VPP, u dei u MP ba mihkhmat ia ka Shillong constituency”.
Haba kyntu ba donkam ban klet noh ia ka kam sain pyrthei hadien ka elekshon, u Bah Ardent ula ong “Kane ka dei ka khubor kaba jam bad ba shai pyrshah ia ki, kiba ju mut sniew pyrshah ia ka VPP”.
