Shillong, Lber 20: Ka National People’s Party (NPP) ha ka sngi Balang, kala ther kylla ia ka Liang Pyrshah Voice of the People Party (VPP) namar ka jingkynnoh ba ka party (NPP) ka dei ka team C jong ka BJP.
Ha ka kyrwoh, u Nongaiktien ka NPP Bah Himalaya Shangpliang ula ong ba kine ki jingkynnoh iadei bad ka BJP ka dei tang ka jingiamutdur suda ba khlem ki jingshisha.
Ula ong ba ka NPP kala jop ia ka elekshon MLA 2023 namar ka jingkyrshan kaba radbah jong ki paidbah ka Jylla, kiba pynshong nongrim na ki kam pynroi kiba ka party kala leh ha kine ki san snem bala leit noh kata naduh u 2018-2023.
“Mynta, ka NPP kala phuh da ka jingkyrshan jong ki paidbah namar ka nud ban leh eiei halor ki ishu ba sahteng jong ka Jylla, kiba la shu ieh baroh shikatta ym ban shu heh tang ka tyngam” ong u Bah Shangpliang.
“Ka NPP kala trei shitom ban ioh ia ka jingjop kaba hun ha baroh artylli ki Parliamentary seat ha ka elekshon Lok Sabha bad ka phakhmat ban pynbteng ha kaban wanrah ia ki kam pynroi na ka bynta ki paidbah bad ban pynkylla dur ia ka Jylla” ula bynrap.
