Ther ka NESO ba thombor ia ki samla ba iakhih ha Delhi | Dawa jingiakren ban wanrah jingkylla ha ki eksam

Shillong, Naitung 24 : Ka North East Students’ Organisation (NESO) kala ther tyngeh pyrshah ia ka jingpyni bor ki Pulit pyrshah ia ki samla pule ba iakhih ha New Delhi ha ka 20 tarik Naitung, bad ong ba kane ka dei ka jingpynkhein ia ka hok synshar paidbah haba dawa ia ka Sorkar pdeng ban khot iakren ia ki samla pule ba iakhih ha ka jaka ban pyni da ka bor.

Ha ka kyrwoh, u Chairman ka NESO Bah Samuel B Jyrwa ula ong ba ka jingpyndonkam ia ki lathi, ki tyndong lyer pynsat khmat bad ka jingkynnoh pyndonkam ia ki Pulit phong jain iing ba rah lathi pyrshah ia ki nongiakhih ba khlem tiar, ka dei ka bym iahap satia bad ka jingthombor ia ka hok ban iakhih da kaba jai jai kat kum ka riti synshar ka ri.

Ka jingiakhih, ong ka NESO, ka dei kaba la pynlong halor ki jingud jingnam bala sahteng la slem bha, kaba la mad da ki samla pule hapoh ka ri baroh kawei-ka jingiai jia ki jinglait tuh ki jingkylli jong ki comptetitive eksam bad ka jingbym don ka jingtreikam kaba shai bad ba don jingkitkhlieh ha ka jing thungkam bad rukom pynlong ia ki test.

“Kine ki kim dei ki kam kiba rit. Ki ktah ia ka lawei jong ki million ki samla pule” ong ka kyrwoh haba bynrap “Ha ka jaka ban pynbeit ia ki jingsngewkhia lyngba ka jingiakren, ka Sorkar kala jied ia ka lynti ban pyntieng pynsmiej bad pynshitom bein”.

Ka NESO ka pynpaw ia ka jingiadon ryngkat bad baroh kito kiba iashimbynta ha ka jingiaid paidbah ba jai jai bad ai ka jingkyrshan ia kito kiba mynsaw na ki jingthombor, haba kitbok ia ki ba kin koit noh kham kloi.

Ka NESO ka dawa ia ka Sorkar India ban plie ia ka lynti na ka bynta ka jingiakren kaba shisha, tynrong ia ka jingkitkhlieh ba pyndonkam palat ia ka bor, bad wanrah ia ki jingpynkylla kiba bniah ban tei pat ia ka jingshaniah ha ki eksamin bad ki jingthungkam.