Shillong, K’lyngkot 24 : Ka Meghalaya Bharatiya Janata Party (BJP) ha ka sngi Balang, kala ther tyngeh ia u Nongialam ka Liang Pyrshah jong ka Congress halor ka jingiathuh lamler ba pulom ka jingialang u Rahul Gandhi ha USTM, Ri-Bhoi namar ka jingbym ai jingbit jong ka Sorkar Jylla.
Ka BJP kala ong ba ka Congress kala shu kynnoh ba la hap pynpep ia ka jingialang u Rahul Gandhi tang namar ba ka Sorkar Meghalaya kam don bor satia pyrshah ia ka jingpynbor jong ka New Delhi bad Assam.
“Hynrei, ka USTM dalade kala pynmih mynta ia ka jingpynshai ha ki rynsan social media. Hangne la kren shai ba la kyntait ai jingbit ia ka Congress da ki bor District namar ka jingbym pynbiang ia ki jing donkam baroh bad ka USTM ruh kam don lad shuh lait na ka jingpynpep ia ka prokram, ka jingshisha kaba ka Congress kam sngew lah ban pdiang” ong ka BJP ha ka kyrwoh.
“Kane baroh ka pyni ia ka jingbym ler treikam dalade, ka jingbym ler treikam kaba dei ka raibi jong ki bor pyniaid ka Congress da ki phew phew snem” kala ong.
Ka kyrwoh ka ong ba ka BJP Meghalaya ka kyntu ia ka Congress bad ki Nongialam ba kin sngewbha ban kren ia ka hok shisien lano bad lada ka dei kaba eh palat, la kumno kumno ruh ka bha ban shu sngap jar.
“Ka jingiuhroit ia ka hok bad ka jingpynkyllain ia ka bym dei sha ka jingshisha ka dei ka buit treikam jong ka Congress ha ka politics. Ka jingialam bakla ka dei ka buit jong ki hynrei ki dang kynnoh pat ia kiwei kiwei. Ka dei ka party ka bym ju ngiah ban pyrta ‘synshar donbor’ haba kren iaka BJP bad klet pat iala ki jingleh bakla ha baroh ki snem bala leit noh” kala ong.
“Kynmaw ia ka Emergency?. Kynmaw ia ka Ain ba pyntjari ia ka President Rule bad pynkut ia ki bor synshar ki Sorkar Jylla hala ka mon jong ka Sorkar Pdeng?” bynrap ka BJP.
