Kular ban rat dyngkhong ia u droks lada shah jied MLA
Shillong, Rymphang 01 : U Bah Rocky Hek hynne ka sngi balang, ula thep kyrteng kum u kyrtong ka National People’s Party (NPP) na Pynthorumkhrah bad kular ban rat dyngkhong iau drok na ka constituency lada shah jied kum u MLA ha ka elekshon ban long la 27 tarik Rymphang.
Ia u Bah Rocky, uba dei u pyrsa kur jong u MLA bala san samoi ka Pynthorumkhrah Bah Alexander Laloo Hek jong ka Bharatiya Janata Party (BJP), la synran da ki bahaiing hasem bad ki nongkyrshan ban leit thep kyrteng hakhmat u Returning Officer.
Haba pynpaw ia ka jingsngewskhem ban lah pynliem ia la u Kni, u Bah Rocky ula ong “Ngi sngewskhem 100 na ka shispah ban ioh jingjop namar ka constituency ka la donkam ia ka jingkylla”.
Ula ong ba ka roi ka par kam shym la wan satia ha ka constituency bad ba ki samla kila ngop ha u droks namar ba kim donkam donkam.
“Nga kular ba lada nga shah jied, ngan leh kat kaba lah ha kaban rat dyngkhong ia u droks-kaba ym ju don ba kren mano mano ruh bad ban kyntiew ia ka ioh ka kot jong ki paidbah ka constituency” ong u Bah Rocky.
Ula kular ruh ban sa buh ia ka job placement cell (ka shnat pynrung kam) na ka bynta ki samla ban ban pynthikna ia ka jingwan ka roi ka par ha ka constituency, kaba u ong ba ia mynta ka constituency kam don satia ia ki surok kiba biang, ka umbam umdih, ki streetlight bad kiwei kiwei.
“Nga kwah ban kyntiew ia ka ioh ka kot jong ki paidbah ha ka jaka ba ai T.500 ne T.1000” ong une u kyrtong ka NPP haba kular ban pyntreikam pura ia ki skhim bapher bapher jong ka Sorkar.
Haba kylli la ka rai ban iakhun pyrshah iala u Kni, u Bah Rocky ula ong ba kane ka dei ka jingkwah jong ki paidbah ka constituency.
“Phi lah ban iohi dala ki jong ki khmat ia ka jingieid bad burom jong ki paidbah ia nga-kila wan ban iaid da ka kjat naduh Mawpat-Nongmensong sha DC Ophis, bad ngam shym la siew eiei ne ai pisa ia ki hynrei kila wan hi dalade” ula kam.
Une u kyrtong ka NPP ula kynnoh ruh ba lada phah sha ki kam pynoi pynpar, ki kam pynroi kila tuid bha sha South Shillong constituency kaba mihkhmat da uwei pat u MLA ka BJP Bah Sanbor Shullai haba ianujor bad ka Pynthorumkhrah.
“Ngi la iohi ha kine ki 10 snem bala leit, u Myntri Rangbah Duh ula ai shibun ki kam pynroi khamtam ia ka thain Shatei Lam Mihngi hynrei ngi lah ban iohi dala ki khmat, bun ki kam pynroi kila poi tang ha Laban constituency hynrei ha ka constituency jong ngi pat ym shym la wan ki kam pynroi. Phi lah ban leit peit dalade kiei ki kam pynroi kiba don ha ka constituency jong nga” ula ong.
Ula kular ruh ba un pynleit jingmut bha halor ka roi ka par jong ka constituency shisien ba u shah jied kum u MLA.
