Shillong, Naiwieng 26 : Palat 500 ngut ki samla kila theo kyrteng ban iakhun ia ka elekshon jong ki nongkitkam bapher bapher ka Indian Youth Congress ha Meghalaya.
Ha ka kyrwoh, u Election Coordinator ka Meghalaya Pradesh Youth Congress (MPYC) Banphira Basaiawmoit ula ong “Ka Indian Youth Congress ka pynbteng ia ka jingkut jingmut ban pynlong ia ka elekshon kaba shai bad ba khuid ban jied ia ki nongkitkam ka Youth Congress ha Meghalaya”.
U pyntip ba ki samla kila pyndep ia ka jingthep kyrteng kum ki kyrtong sha ka kam State President, General Secretary bad kiwei ki nongkitkam ha Jylla. Nalor kane, ka jingthep kyrteng ha ki District bapher bapher ruh kala sdang.
“Ngi sngewkmen ban pynbna ba palat 500 ngut ki samla kila thep kyrteng kum ki kyrtong ha ki kam paber bapher kaba la kut noh hynnin ka sngi ka 25 tarik Naiwieng lyngba ka Indian Youth Congress Online registration system lyngba ka ‘With IYC” App” ong u samla Banphira.
Ula kyntu ia ki samla ka Jylla ban vote ia u State President bad kiwei ki District President da kaba pyndonkam ia kane kajuh ka app haba pyntip ba ka sngi ba khatduh ba thep vote kan long ha ka 16 tarik Nohprah, 2024.
