Shillong, Lber 24 : Ka Sorkar Jylla kala thaw biang ia ki lai tylli ki Regional Committee ki ban shong bishar ia ka jinglong jingman ba mynta jong ki hynriew tylli ki jaka kajia pud kiba dang sah bad ban aiti ia ka kaiphod hapoh ka 45 sngi.
Kine ki jaka ki kynthup ia ka Langpih ha West Khasi Hills District, Borduar, Nongwah-Mawtamur, Deshdoomreah, Block-II kiba don ha Ri-Bhoi bad ka Block-I, Khanduli kiba hap ha West Jaintia Hills District.
Ia kane la pyntip da u Chief Secretary ka Jylla Bah DP Wahlang hynne ka sngi thohdieng.
Ki arngut ki Symbud Myntri Rangbah ka Jylla- Bah Prestone Tynsong bad Bah Sniawbhalang Dhar, kin khlieh ia ka Regional Committee ka Ri-Bhoi District bad West Jaintia Hills District katba u Myntri Sorkar Bah Paul Lyngdoh un long u Chairman ka Regional Committee ka West Khasi Hills District.
Ki Dkhot ka Ri-Bhoi Committee ki kynthup ia u Bah Sosthenes Sohtun, MLA Jirang, Chief Whip ka Sorkar Bah Mayralborn Syiem, MLA Nongpoh Constituency, Bah Damanbait Lamare, MLA Umroi Constituency, Bah Charles Marngar, MLA Mawhati Constituency, Jambor War, Executive Member KHADC (Elaka) bad Deputy Commissioner, Ri Bhoi District kum u Member Convenor.
Ia ka West Khasi Hills, ki dkhot ki dei u Bah Renikton L Tongkhar, MLA Mawkyrwat Constituency, Methodious Dkhar, MLA Mawshynrut Constituency, Remington Gabil Momin, MLA Rambrai-Jyrngam Constituency, Gigur Myrthong, Deputy CEM, KHADC, Bajop Pyngrope, MDC, Rambrai-Jyrngam bad u Deputy Commissioner, West Khasi Hills District kum u Member Convenor.
Ki dkhot ka West Jaintia Hills ki dei u Bah Comingone Ymbon, Myntri Sorkar, Lahkmen Rymbui, MLA Amlarem Constituency, Nujorki Sungoh, MLA Mowkaiaw Constituency, Thombor Shiwat, CEM, JHADC, Aiborlang Shadap, MDC, Barato-Mukroh bad Deputy Commissioner West Jaintia Hills District kum u Member Convenor.
Pule lang ia kane: Pyntip u DyCM : Lah dep pynkhreh iaka Blueprint ban weng ia ka jingkhapngiah ka Shillong
Ka kyndon treikam jong kine ki Regional Committee ka long ba kin iatreilang bad ki Regional Committee bala thung da ka Sorkar Assam, ban iapynthikna bad pynshisha ia ki kyrteng jong ki Shnong bala kam da ka Meghalaya bad ki kyrtong jong ki Shnong kat kum ki kot ki sla ka Sorkar Assam, ban pynthikna ia ka liang ba kine ki shnong ki don.
Ki dei ruh ban shong bishar ia ka jingdon ki Nongshongshnong ha kane ka shnong kat kum ka khana samari kynthup ka Jadbynriew bad ban pynkhreh ia ka thup jong ki Nongkynti Sorkar kiba don ha kine ki Shnong bala wanrah da baroh artylli ki Sorkar. Ban leit iuhkjat sha man kawei pa kawei ka Shnong bad ban iakren iakhana bad ki Nongshongshnong jong kine ki Shnong kynthup ki Nongmihkhmat sha ki Autonomous District Counci bad kiwei kiwei ki kynhun, khnang ban tip ia kaei ka jingmut jong ki briew ba sah ha kine ki jaka bad ban buh jingthoh bad ki jingtip ba biang thik pa thik haba iadei bad ka jingjngai bad jingshimpor ban leit na kine ki Shnong sha ki Ophis Sorkar kiba don marjan eh. Ki Committee ki lah ruh ban thung ia kino kino ki dkhot haba sngew donkam.
Haba iadei bad ki jingdonkam baroh, ki Deputy Commissioner kin ai ia baroh ki jingiarap na ka bynta ka jinglah treikam bha jong ki Committee bad ki Member Convenor jong kine ki Committee ki dei ban buh ia ka tarik halor ka jingleit iuhkjat sha ki shnong ki thaw bad ka jingiakren ryngkat ka jingiasyllok lang bad ki Committee jong ka Sorkar Assam.
Haba iadei bad ka kaiphod jong ki Committee, ki Committee kin aiti ia ka kaiphod sha ka Sorkar Meghalaya hapoh ka 45 sngi n aka sngi ba pynmih ia kane ka jingpynbna, kaba la pynshong nongrim ruh na ki jingleit jurip ia ki shnong bad naka sienjam ba iamynjur lang kat kum ka histori, ka jingdon ki jaidbynriew ha kine ki shnong, ka jingsngew jan ki paidbah haba phai sha ka synshar khadar bad kiwei kiwei.
Pule lang ia kane: Shah mait kyrteng u Rahul Gandhi kum u MP ka Lok Sabha
