Shillong, Lber 10: U Director General of Police (DGP) u Dr LR Bishnoi hynne ka nsgi Thohdieng ula pyntip ba ka Tnad Pulit ka la rejistar 16 tylli ki case bad la kem haduh 69 ngut ki briew ha ka por ba don iaka MLA Election haka jylla Meghalaya.
U DGP ula ong kila don 13 tylli ki case kiba la jia hashwa ban long ka elekshon bad 3 tylli ki case kidei kiba la jia hadien ka elekshon bad ula iathuh ba 56 ngut kiba shah kem ki dei ha shwa ban long ka elekshon katba 13 ngut kiba la shah kem k idei hadien ba la dep pynlong iaka elekshon.
“Ka jingpynlong ia ka elekshon ka la long kaba jai jai bad kaba iaid beit bad la kem ruh ia ki katto katne ngut ki briew. Ka jingioh kurup ruh ka long kaba bun bha bad la pynkhein syndon iaka rekod ha kine ki 50 snem. Ka jingioh kurup baroh kala kot sha ka T.76-77 Klur bad ka long kaba heh phra shah bad ia kaei kaba la ioh kurup ha ki snem kiba la dep” ong u DGP.
Ki pulit ha ka por elekshon kila ioh kurup ia ka pisa T.3.06 Klur, ka kyiad kaba shongdor T.1.95 Klur, u Drug uba shongdor T.12 Klur, ka ksiar kaba shongdor T.30 Lak bad ki jingai sngewbha kiba shongdor T.30 Lak.
Lah ban kdew ba ka jylla Meghalaya kala wan hakhmat eh ha ka jingioh kurup haba ianujor bad ka jylla Nagaland bad Tripura ha ka por elekshon MLA 2023.
U DGP ula pyntip ba ki pulit ka jylla ha kine ki 6 bnai kiba la dep, kila ioh ban kurup bun bah ki jingdih pynbuaid ha kaba la pynkheiñ syndon ia ka rekod jong ki 50 snem kiba la leit naduh ba la ioh ia ka jylla kaba pura.
Ula ong, ki nongdie drok kila iai bteng ban die ia u drok mar ia ioh jamin naka iingkashari.
U DGP Bishnoi ula iathuh ba ka Tnad Pulit kala shim ia ka rai ban pyntreikam noh iaka PITNDPS Act 1985, kaba don ia ka kyndon ban kem ia ki nongdie drug.
“Ngi la phah 10 tylli ki mat jingtyrwa sha ka sorkar bad mynta kine ki jingtyrwa ki dang don hapdeng ka jingkhmih bniah. La dep ruh ban thung iaka Advisory Board bad shisien ba la ioh ia ka jingmynjur, kiba ju mlien ban die be-aiñ ia u drug kin shha kem bad yn phah sha phatok wat lada ym ioh ban kurup drug na ki” ong u DGP.
Ula ban jur ba ka dei ka kamram jong iwei pa iwei i nongshong shnong ka jylla ban pyndkut ia u kynjri jongki nongdie bad ki nongthied ia u drug.
