Nongpoh, Nailur 16: Haduh 18 tylli ki Shnong ka thain Nongpoh, kila thaw ia ka Synjuk ki Rangbah Shnong Greater Nongpoh ban wanrah ia ka jingtylli ki Shnong ka thain bad ruh ban kyntiew ia ka dong ka thain ha ka roi ka par.
Ia kane ka Synjuk la thaw ha ka jingialang jong kine ki 18 Shnong kaba long hynne ka sngi Saitjain ha ka Iingdorbar Shnong ka Mawroh.
Kane ka jingialang kala rai ban jied ia u Bah Kyrshan Lapang kum u Chairman, u Bah Badhok Nongmalieh bad u Bah Sylvester Mynsong kum ki Vice Chairman, u Bah Mathew Makdoh kum u Secretary, u Bah Ronald Khongjoh bad u Bah Moris Lyngdoh kum ki Joint Secretary, u Bah Rex Warjri kum u Treasurer bad u Bah Opel Lyngdoh kum u Adviser jong kane ka Synjuk.
Haba ai jingtip shaphang ki nongrim treikam ka Synjuk ki Rangbah Shnong Greater Nongpoh, u Bah Kyrshan Lapang u la pynpaw ba kathong ba khmat eh ka long ban peit shuwa ia ki jingdonkam ha ka roi ka par ha kiba bun ki liang bad ban kyntiew ia ki shnong ki thaw ha ka ioh ka kot ki nongshongshnong”.
Ula ong ba ki don shibun ki kam kiba ka synjuk kan hap ban khmih bad shimkhia khamtam ia ki kam kiba ktah ia ka imlang sahlang ha kine ki shnong. U ong ba ka Synjuk kan ym shongkli kti ban peit ia ki jingeh kiba don hapoh ka Imlang sahlang bad ban iatreilang ha kaban wanrah khamtam eh ia ka shongsuk shongsain ha ka thain.
Une u Chairman ula pynpaw ia ka jingkmen kaba khraw ba ki nongialam shnong jong ki 18 tylli ki shnong ki la shimbynta da kawei ka jingmut ban don ka jingiatylli bad ruh ka jingiasngewthuh jingmut kum ki nongialam shnong kiba hap hapoh ka thain Nongpoh.
U la iathuh ba ia kane ka Synjuk ki Rangbah Shnong la thaw bad jied shwa tang ia ki Rangbah Shnong jong ki shnong ba hap hapoh ka thain Nongpoh bad yn sa pynbeit pat ruh da kumwei kumno ban kdup sa ia kiwei ki dkhot kham hadien habud ynda ka jingtreikam jong kane ka kynhun ka la sdang bad iaid bha kumba angnud.
