Shillong, Risaw 10 : Ki artylli ki seng riewlum ka Jylla-ka United Democratic Party (UDP) bad ka Hill State Peoples Democratic Party (HSPDP), hynne ka sngi Nyngkong, kila thaw ia ka Regional Democratic Alliance (RDA) ha Umroi Constituency ban pynkhreh ia ka elekshon MLA-2023.
Ka Umroi Constituency ka dei kaba la mihkhmat da u Bah George B Lyngdoh uba jop ia ka elekshon MLA-2018 na ka Congress bad uba la leit pyniasoh noh sha ka All India Trinamool Congress (AITC) ba ialam da u Dr Mukul Sangma.
Ka UDP bad HDPDP kila thaw ia kane ka kynhun synrop ha ka jingialang kaba long ha Bhoirymbong.
Ha kane ka sngi, la thung ruh iaki Nongialam jong ka kynhun synrop ba kynthup ia u Bah PB Sylliang kum u Chaiman, Bah Peter Madur kum u Vice Chairman, Bah Ailong Pariat kum u Secretary, Bah Pynskhem Sun kum u Asst Secretary, Bah Lumlang Lamarai kum u Organising Secretary bad 30 ngut ki dkhot ka Executive Committee.
Kane ka jingialang kala iasyllok ruh halor ka jingsei ia u kyrtong ban aireng na ka kynhun synrop ha kane ka elekshon ban wan. Kat haduh mynta, ym pat don napdeng kine ki artylli ki seng riewlum ki ban sei ia u kyrtong ba thmu ban mih aireng ha kane ka elekshon ban wan.
Ka jingialang kala rai ruh ban sa lum ia ka jingialang bah jong ki Nongkyrshan ha ki sngi ban wan ban shim ia ka rai halor u kyrtong ban leit ai jingkyrshan.
