Shillong, Jylliew 10: Ka Sorkar Pdeng hynne ka sngi Saitjain, kala thaw ia ka Komiti na ka bynta ka Jingiasuk ha ka jylla Manipur hapoh ka jingialam jong ka Lat ka Jylla, Manipur ka Anusuiya Uikey.
Ki dkhot jong ka komiti ki kynthup ia u Myntri Rangbah u N Biren Singh, katto katne ki Myntri ka Sorkar Manipur, ki MP, MLA bad ki nongialam na ki seng sain pyrthei.
Ka komiti ka kynthup ruh ia ki nongtrei sorkar barim, ki nonghikai, ki nongthoh kot, ki barikor, kito kiba trei ha ki kam kiba iadei bad ka imlang sahlang bad ki nongmihkhmat na ki jaidbynriew bapher bapher.
Ka kam ba la buh hakhmat jong kane ka komiti ka dei ban plie lad ia ka jingiasuk hapdeng ki jaidbynriew bapher bapher jong ka jylla, kaba kynthup ruh ia ka jingiakren hapdeng ki kynhun kiba dang ia umsnam.
Ka komiti kadei ban pynkhlain ia ka jingiatylli ha ka imlang sahlang, ka jingiasngewthuh jingmut bad ka dei ruh ban plie lad ia ka jingiakren hapdeng ki jaitbynriew bapher bapher.
U Myntri Sorkar Pdeng ba dei khmih ia ki tnat Kam Pohiing bad Cooperation, u Amit Shah u la don ha Manipur naduh ka 29 tarik u Jymmang 2023 haduh ka 1 tarik u Jylliew 2023 bad u la pynbna ia ka jingseng ia ka Komiti na ka bynta ka Jingiasuk hadien ba ula leit peit ia ki jinglong jingman ha Manipur.
