Shillong, Rymphang 03 : Ka Sorkar kala thaw ia ka Committee jong ki 15 ngut ki stad ki jhad ban ai jingmut ia ka Sorkar halor ki sienjam ba dei ban shim ban iada bad pynkylla dur biang ia ki Wah sha ka mynnor bad ruh ban buh kyndon kumno ban iada ia ki Wah ha ka Jylla da kaba thaw ia ki kyndon haba iadei bad ki jingtei ban sa mih ha sawdong ka pung Umiam.
Ia kane ka Committee la thaw kat kum ka jingpynbna bala pynmih da ka Sorkar ha ka 19 tarik Kyllalyngkot. Ia kane la pyntip hakhmat ka Iingkashari Meghalaya High Court haba bishar ia ka PIL hynne ka sngi palei.
Ka Iingkashari ha ka hukum kala ong ba ia ki kyndon ban tian bishar la I kumba kila lut bad kawei na kine ki kyndon ka long ba la thaw thaw ia ka Committee ki stad ka ban iakynduh shisnem ha ka shibnai.
U Advocate General ula pyntip ba ia ka kaiphod jong ka Committee yn sa aiti sha ka Tnad Forest & Environment jong ka Jylla bad ia kane ka juh yn sa shong bishar bad pyntreikam kat kaba ibit.
Kawei na ki kyndon jong ka jingpynbna ka long ba watla ia kane ka committee la dep ban thaw haba iadei bad ki wah ha Jylla, ka kyndon ba iadei pat bad ki jingtei ki long pat tang ia ka pung umiam ym ha kiwei pat ki wah.
Kan bha eh lada ki bor khmih ki ai jingmut ban pyntreikam lang ia ki kyndon sha kiwei pat ki wah naba ki jingtrei hajan ki wah ki lam sha ka jingjot bad jingpyniap ia ka wah.
Kawei pat ka phang jong ka committee ka long ba kam don lang ki dkhot ka Autonomous District Council (ADC).
Namar ba bun ki jaka ha Jylla lait noh ka European Ward ha Shillong, ki dei ki jaka jong ki paid riewlum trai muluk bad ki ADC ki khmih ia kine ki jaka, kan iahap ba ki wah kiba don hapoh u pud u sam jong ki ADC, ki dkhot ki ADC kin long dkhot lang ha ki Sub Committee ba iadei bad kine ki wah bad kane ka sub committee ka dei ban ai kaiphod sha ka Committee ki stad ki jhad bala thaw kat kum ka jingpynbna ba 19 tarik Kyllalyngkot 2023 na ka bynta ka jingai jingmut ba khatduh.
Ka Iingkashari ka ong ba ka Sorkar Jylla kala mynjur ba tad haduh bala dep pynmih ia ki jingai jingmut ia ki kyndon ba iadei bad ki jingtei ha sawdong ka pung umiam, ym dei ban nang don ka jingpyntrei ia ki jingtei ha sawdong ka pung Umiam narud wah haduh 50 meter.
“La khmih lynti ba ia kane ka policy yn pyntreikam ruh sha kiwei ki wah khnang ban tehlakam noh ia ki jingpynjot shuwa ban mih ki jingai jingmut ha kaban pynim, maramot ia ki wah kiba sah kiba don hapoh ka Jylla” kala ong.
Ka Iingkashari kala buh ban bishar biang ia kane ka kam ha ka 16 tarik u Lber.
