Shillong, Rymphang 03: U kyrtong ka National People’s Party (NPP) na West Shillong Constituency bah Mohendro Rapsang hynne ula ong ba u don ka thong ban pynkylla iaka West Shillong kum ka Smart Constituency lada u jop biang ha kane ka elekshon MLA ban wan.
Ia kane u bah Mohendro ula ong hadien ka jingwan thep kyrteng kum u kyrtong ban iakhun ha ka elekshon ka ban long haka 27 tarik mynta u bnai.
Haba kren sha ki lad pathai khubor u bah Mohendro ula ong ba ha ki san snem ba u long kum u MLA ka West Shillong, ula wanrah shibun ki jingkylla haka Constituency hynrei sniew bok namar bun ki kam kila sah kut namar ka jingwan lynshop ka khlam COVID-19.
Ula ong ba kum u MLA ula wanrah shibun ki kam pynroi hapoh ka Constituency khamtam haba iadei bad ki lad ban wanrah ia ka shong suk shong shngain hapoh ka thain bad kumjuh ruh ban kyntiew iaka ioh kam ioh jam ki samla lyngba ki projek bapher bapher.
Shuh shuh u bah Rapsang ula ong ba ka jingmih noh naka Congress ban iakhun iaka elekshon 2023 na ka NPP ticket kam ktah ia u namar iaka rai ban mih na Congress la shim hadien ka jingiasyllok bad ki paidbah nongkyrshan bad kumjuh ruh ki nongialam.
“Ha man ka elekshon ka don beit ka jingkynnoh bamsap iaka party ba ialam iaka sorkar jylla hynrei kine baroh kidei tang ki nia elekshon jong kito kiba ialeh pyrshah bad khlem artatien un kyrmen skhem ba un ioh ka jingjop ha kane ka elekshon namar ki paidbah ka West Shillong ki dang shaniah haka NPP” la ong u bah Mohendro.
