Shillong Nailar 09: U Chief Secretary ka Jylla u Bah DP Wahlang ha ka sngi Thohdieng, ula ong ba ka sorkar jylla kala shim ia kiba bun ki sienjam ban kham pynkiew ia ka jingpynngat ha ka jingpynsajia ia ki briew ba donkti ha ki kam thombor ia ki kynthei hapoh ka Jylla.
Katkum ka jingong u Bah Wahlang, ka sorkar kala thaw ia ka Directorate of Prosecution, ka ban khmih thik tang ia ki kam ba iadei bad ka jingiasaid case pyrshah ia ki nongleh kam bymman.
“Ngi lah shim ia kiba bun ki sienjam na ka liang jong ka sorkar da kaba thaw kyrpang ia la ka jong ka Directorate of Prosecution mynta u snem (ban khmih thik tang ia ki jingiasaid case pyrshah ia ki nongleh bymman),” ula ong haba iakren bad ki nongpathai khubor haba pyntip ba la dep ruh ba ka Sorkar kala dep ban thung ia ki Additional Public Prosecutors.
“Yn sa thung ia ki Public Prosecutors ha baroh ki district ban pynkhlain ia ka rukom treikam ha kaba iadei bad ki kam iasaid ia ki case” la pynbna u Bah Wahlang.
Ka sorkar ka thmu ban pynjanai ha ki kam pynngat ha ki jingpynsajia ia ki nongleh kam bymman da kaba phiah ia ka kam tohkit bad ia ki kam iasaid ia ki case.
U Chief Secretary ula batai ba ka jingthaw ia ka Fast Track bad Special Court ka shong eh ha ki aiñ. Haba donkam, ka sorkar kala thaw ia ki Fast Track Court ban pynkloi ia ki kam kiba iadei bad ka jingtian bishar.
U Bah Wahlang ula banjur ba watla ka imlang sahlang kadei kaba shim jait na ka kmie, hynrei ki kam thombor ia ki kynthei ki dang iai jia hynrei kim shym la don ki sabut ba kan don ka jingkiew kynsan.
“Kam dei ba ka don ka jingkiew kynsan ki kam thombor ia ki kynthei, kaei kaba nga kdew kadei ba watla ngi dei kiba shim jait na ka kmie hynrei ki kam thombor ia ki kynthei ka don, ki don ki jingjia hynrei kam dei pat ba kadon ka jingkiew kynsan” ula ong.
Ha kaba iadei bad ka jingwan jngoh jong ka Chairperson ka NCW, u Bah Wahlang ula pyntip ba la pynlong ia ka jingialang da kaba pynleit jingmut ha kiba bun ki mat kiba ktah ia ki kynthei ha ka jylla, kynthup ia ka jingpyndonkam ia ki droks bad ka jingshah lehbeiñ ha ïing.
Ka Chairperson ka NCW kala pynpaw ia ka jingsngewkhia halor ka jingkiew jong ka jingpyndonkam ia u droks bad ki kam runar pyrshah ia ki kynthei ha ka jylla Meghalaya.
U Chief Secretary ula pyntip ha ka chairperson ka NCW ia ki sienjam kiba la shim da ka jylla kaba kynthup ia ka One Stop Centre ka Center kaba kyrpang na ka bynta ki kynthei kiba la shah ktah na ka jingshah lehbeiñ ha ïing da kaba ai jingsumar bad jingkyrshan bad ka DREAM project kaba thmu ban pynduhjait ia ka jingpyndonkam ia u droks bad ban ai jingiarap ia kito kiba la shah ktah.
U Bah Wahlang ula ong ba la pyntip ia ka Chairperson ia ki sienjam kiba la shim da ka tnad Pulit halor ka jingpyndonkam ia u droks bad ka jingshah lehbeiñ ki kynthei ha ïing.
Ka Chairperson kala pynpaw ia ki katto katne ki jingsngewkhia hynrei kala pynpaw pat ia ka jingsngewhun haba khein kyllum iaka jingshimkhia jong ka sorkar,ula ong haba pyntip ba ka Chairperson ka NCW kala pynbna ia ki jingthmu ban wan jngoh biang ia ka jylla Meghalaya hadien 6 bnai ban khmih biang ia ka jingpyniaid ia ki kam da ka sorkar jylla ha kaban shimkhia ia ki mat.
