Shillong Lber 06: Ka Sorkar Jylla kala thaw ia ka Committee ban iakhmih biang ia ka Meghalaya Building Byelaw bad ai jingmut lada donkam ban wanrah ia ka jingpynkylla ia ki kyndon.
Kane ka rai kala mih naka jingialang bala pynlong da u Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong bad ki lai tylli ki Autonomous District Council (ADC) ka Ri-lum Khasi, Jaitnia bad Garo, kaba long hynne ka sngi Balang ha Shillong.
Kiba la iadonlang ha kane ka jingialang ki kynthup ia ki Ophisar na ka Tnad Urban Affairs, ka Tnad Revenue bad kiwei kiwei.
Haba iakren bad ki nongthoh khubor, u Bah Prestone ula ong ba ka Sorkar Jylla ha u 2019 kala dep ban pynmih jingpyn bna (notified) ba ka Meghalaya Urban Development Authority (MUDA) bad ki lai ADC ba kin pyntreikam ia ka Building Byelaws hapoh ka Jylla.
Kat kum ka jingong jong u, ki ADC kin pyntreikam ia ka byelaw shabar ki jaka ka Municipal. Hynrei, katto katne ki jaka kum ki Industrial Estate, ki Hotel bad ki jingtei kiba heh kin dei kiba hap hapoh ka jingkhmih ka MUDA.
U iathuh ba ha ka jingiakren ia kane ka kam, la shem ba ki dang don katto katne ki kam kiba donkam ia ka Sorkar ban iakhmih biang ia ka building byelaws. Kane kala mih hadien ba ki District Council ki kwah ban pyntreikam lang ia ka building byelaws ha baroh ki jaka Sixth Schedule khlem da khein la ki dei ki jaka sor ne jaka nongkyndong.
“Nga sngew shimet ba kane ka jingai jingmut ka dei kaba biang bha lada ia ka building byelaw la pyntreikam ia baroh ki jingtei bad baroh ki nongshongshnong ka Jylla namar katba ngi dang pyntreikam ia ka, katta ka jingshngain kan nang wan hapoh ka Jylla Meghalaya baroh kawei khamtam ba ka Jylla ka dei kaba jur ka jingkhynniuh jumai bad ngi hap ban phikir bha bad ban pynthikna ba ki briew ki shna ia ki iing kiba shngain” ong u Bah Prestone.
“Namar kata, ngi la rai ban thaw ia ka Committee kaba long kum ka Coordination lane Consultation Committee ka ban khlieh da u Secretary ka Tnad Urban Affairs, ban shong bishar bad iaknieh biang ia ka byelaws ba ngi don mynta bad ruh ban peit la dang donkam ne em ban wanrah jingpynkylla ia ka..ia kane ruh ngi la ieh ha kane ka Committee ia kaban sa pynmih jingpynbna noh shen” ula ong.
Ula ong ba ki dkhot jong kane ka Committee kin long ruh na baroh lai tylli ki District Council nalor ki Ophisar ka Tnad Urban Affairs, ka Revenue bad kiwei kiwei ki Tnad ba iadon bynta lang.
