Thaw ka Sorkar ia ka Anti-Terror Squad ban tem ia ki kam pyntriem ki lehnoh ha Jylla

Shillong, Nailur 29 : Ka Sorkar Jylla kala thaw ia ka kynhun Anti-Terror Squad (ATS) ba kyrpang, ka ban peit beit thik tang ia ka jingtehlakam ia ki kam lehnoh ha Jylla.

Ia ka Ophis ba shipor la plie hapoh ka Police Headquarter da u Myntri Rangbah ka Jylla Conrad K Sangma ha ka sngi Nyngkong ha ka jingiadonlang u Symbud Myntri Rangbah ba khmih ia ki kam Pohiing (Police) Bah Prestone Tynsong.

U Conrad ula pyniaid ruh ia ka dorbar bah ba arsngi jong ki Superintendent of Police bad ki Commandants (SsP-COs), kaba iatai ia ki mat bapher bapher, kiba iaid tawiar ia ka jingdonkam ban nang pynkhlain shuh shuh ia ki bor Pulit ha ka Jylla.

Haba kren sha ki lad pathai khubor hadien ka jingialang, u Bah Prestone ula ong ba ka ATS ka dei ka kynhun ba kyrpang ka ban khlieh da u Deputy Inspector General of Police (DIG) bad ka kamram jong ka, ka long ban khmih ia kino kino ki kam ba iadei bad ki jingbyrngem pyntriem ki kynhun lehnoh, kynthup ka jingbyrngem pynbthei bomb bad ki riew ishan khmat hapoh ka Jylla.

“Ka ATS ka dei ka Cell ba treikam la ka jong, ka ban shimti bad leh eiei halor ki jingbyrngem pyntriem ki lehnoh, ban pynthikna ia ka jingshngain bad jingiada ia ka Jylla. Kane ka kynhun ka dei kaba la pyntbit ban leh eei halor ka jingbyrngem pynbthei bomb bad ki song ba suba buh bomb” ula ong.

Haba kylli la ka ATS ka iasyriem kum ka National Security Guard (NSG), u Bah Prestone ula pynshai ba katba ka ATS ka dei ka kynhun ba kyrpang hapoh ka Police Headquarter, kam donkam ba kan iasyriem bad ka NSG. Hynrei, ka ATS kan ioh lut ia ki jingdonkam ban lah tem kham bha ia ki kam pyntriem ki lehnoh.

Halor ka jingdon briew, u Bah Prestone ula ong ba ka Tnad Pulit ka dang pyndonkam mynta da ki Pulit bala don lypa, hynrei ka jingthungkam kan dang iaid ban nang pynkhlain ia ka Tnad. Ula kular ba ki kam ba iadei bad ka jingthungkam kala don ha ka bynta ba khatduh eh bad kan iarap ban nang pynbun ia ka jingdon briew hapoh ka Tnad Pulit, kynthup ka ATS.

Haba bynrap, u DIG ka Eastern Range Davies NR Marak ula ong ba ka ATS kan dei ka specialized agency ka ban khmih ia baroh ki kam kiba iadei bad ki kam lehnoh, kynthup ki jingkhynra, ki jinglum khubor syntiat bad ki jingtohkit.

U Marak ula batai ba katba ka Tnad Pulit kala don ia ki Unit bapher bapher ban peit ia ki kam bapher bapher, ka long kaba donkam ban don ia ka Unit ba la pyntbit ka ban pynleit jingmut beit thik tang ia ki kam lehnoh.

“Kane ka dei kaba la buh daka MHA ban thaw ia ki Unit ki ban khmih ia ki kam lehnoh, la ka dei ka jingkhynra, la ka dei ka jinglum khubor syntiat, la ka dei ka jingtohkit bad kiwei kiwei. Kumta, da kaba buh ia kane ha ka jingmut jingpyrkhat, ngi la thaw ia ka ATS ka ban khmih beit thik tang ia ki kam lehnoh” ula ong haba bynrap “Ka ATS kan don artylli ki Unit-kawei ka ban khmih ia ki kam iakhun lehnoh ha khlaw bad kawei ki ban iakynhun lehnoh ha ki jaka sor. Kane ka Unit kan treikam ha ri-lum Garp bad kin ioh ia ki tiar ialeh kiba khlain, ki jinghikai pyntbit bad kiwei kiwei”.

Kane ka jingialang kala sakhi ia ki jingai jingbatai bad ka jingiasyllok halor ki mat bapher bapher kynthup ka Cybercrime, ka ain kam bymman ba thymmai, ki jingpyrshang ban tehlakam ia ka jingrung beain ki mynder ri bad ki sienjam ba donkam ban shim ban iakhun ia ka jingwan rung u droks.