Bun ki samla donsap ki ngop ha ki jingsniew namar bym don rynsan ba paka’: Mercy Rupsi
Nongpoh, Naitung 06: Kawei ka Kynhun ki Longkmie bala lamkhmat da ka Kong Mercy Rupsi, kala thaw ia ka Football Academy bala tip kum ka SOZO Football Academy hapoh ka shnong Jorbil, Ri-Bhoi District, ka ban long kum ka shlem ai jinghikai pyntbit ia ki khynnah ialehkai phutbol naduh ba ki dang khynnah haduh ba kin da biang pura ka rta.
Ia kane ka Football Academy la plie paidbah hynne ka sngi Palei bad la pynshongkun ia kane ka sngi da ki lympung ialehkai phutbol ki heprit lane ka Knock Out Football Tournmanet ha ka U-10, U-13 bad U-18. Ki Heprit na kylleng ki shnong ka thain Jorbil kila wan ban iashimbynta kynthup ruh ki Khynnah kiba wan na Nongbah Guwahati.
Ha ka kane ka jingiakop ialehkai football, ha ka kyrdan kaba10 snem ia ka nam lahruh la rah da ka Nokchikitham Fc, ha ka kyrdan ba 13 snem shapoh la ioh da ka Warrior FC na Guwahati bad ha ka kyrta kaba 18 snem pat la iohrah da ka PJP FC na Guwahati bad ia ka sngi ban pyniakhun ia ka phainal kan long ha ka 8 tarik ha madan shnong Jorbil Ri Bhoi district kaba dei ruh ka madan ban ai jinghikai jong ka SOZO football Academy.
Na ka liang ka Kong Mercy Rupsi, kum ka nongseng lane ka President jong ka SOZO Football Academy, ka la pynpaw, ba ka rai ban seng ia kane ka shlem ai jinghikai ia ki heprit ha ka liang ka kam ialehkai football ka long halor ka jingiohi ba bun na ki khynnah samla ha kane ka thain ki dei kiba tbit ban ialehkai football, hynrei ka jingbym iohlad ka jong ki pat ban pyntbit shuh shuh ia ka sap jong ki, ka jingphohsniew jong kine ki heprit ka shu kut noh tang ha i madan ialehkai i barit ha ki shnong jong ki.
Ka la ong ruh, ba ka la sakhi, ba bun ki heprit ne ki samla donsap ha ki kam ialehkai sport hynrei tang namar ka jingbym ioh ka jong ki ia ki rynsan ban pyntbit shuh shuh ba kin long briew man briew na ki kam ialehkai sport, phewse, kane ka jingkhanglad ka la ialam bakla pynban ia kiba bun ki samla ban ngop ha ki jingsniew la ka dei ha ki kam dih buaid kum ki drok bad kiwei kiwei bad ruh kum ki kam tuh kam thiem kiba la nang jyllei na kawei ka sngi sha kawei pat.
Ka ong ba dei halor kane ka nongrim, ba kane ka kynhun jong ki longkmie kiba la iohi jngai ia ka jingma ia la ki khun ki kti, ki la shim da kane ka sienjam kaba kham iar bad bym pat ju ioh sngew ba ki long kmie na I shnong i barit ba kin seng ia ka jaka ai jinghikai football ia ki khynnah ryngkat ka jingiarap ruh na ki nonghikai (Coach) napoh ka nongbah Guwahati kiban kynthup ia u Prakhash Rai u ba dei trai jong ka PJP Academy Fc bad u Sagar Bora jong ka Warrior Club, ki ngeit skhem ba kin kot sha ka thong jong ka jingangnud ka jong ki ban shakri na ka bynta kaba bha tam.
Pule ruh: Dep iasoi soskular ka Tnad Urban bad Home Jail ban pynkynriah ia ka Shillong Jail sha NST
