Shillong, Jylliew 19 : Ka National Peoples’ Party (NPP) bad ka Indian National Congress (INC) kila thaw ia ka kynhun Khasi Hills Democratic Front (KHDF) ka ban thaw ia ka Executive Committee ba thymmai hapoh Khasi Hills Autonomous District Council (KHADC).
Ha kajuh ka por, kane ka Kynhun kala tyrwa ia ka kyrteng u MDC ka NPP na Sohryngkham Bah Pyniaid Sing Syiem ban long u kyrtong sha ka shuki Chief Executive Member (CEM) ha ka elekshon ka ban long lashai ka 20 tarik Jylliew.
Kat haduh ba thoh ia kane ka khubor, ki kyrtong kiba la thep kyrteng ban iakhun ia ka elekshon ki dei tang u Bah Pyniaid Sing Syiem marwei, kaba mut ba u Bah Pyniaid Sing Syiem ula jop khlem ka jingialeh pyrshah ban long u CEM ba thymmai jong ka Council.
Kane ka jingthaw kynhun Thymmai kala mih hadien ka jingkhyllem noh ka Executive Committee jong ka United Democratic Alliance (UDA) ba ialam da ka United Democratic Party (UDP) hapoh ka jingialam u MDC ka Sohra Bah Titosstarwell Chyne.
Ka EC jong ka UDA kala khyllem lyngba ka No-Confidence Motion (NCM) bala wanrah da u MDC ka NPP na Rambrai-Jyrngam Bah Bajop Pynrope, uba la pynpaw ia ka jingbym shaniah shuh ia u CEM Bah Titosstarwell namar ka jingshim rai hi dalade ia kiba bun ki kam khlem da kynjoh ktien lem ia ki dkhot ka Executive Committee (EC) bad UDA.
Kumba long mynta, ka kynhun KHDF jong ka NPP bad INC ka don haduh 18 ngut ki MDC kaba kynthup ia 12 ngut na ka NPP bad 6 ngut na ka INC.
Haba iakren bad ki nongthoh khubor hadien ba dep thep kyrteng, u Bah Pyniaid ula pyntip ba ula thep ar thup ki kyrteng (nomination)-kawei bala tyrwa da u Bah Bajop Pyngrope bad kyrshan da u MDC ka Congress na Mawkyrwat Bah Carnes Sohshang bad kawei pat bala tyrwa CEM ia u da u MDC ka Congress na Mairang Bah Batskhem Ryntathiang bad kyrshan da u MDC ka Malki-Laitumkhrah Bah Fantin J Lakadong.
U iathuh ba kat kum ka jingtip ba u ioh lum, ym shym la don satia mano mano ruh ba thep kyrteng ban iakhun ia kane ka elekshon CEM ka ban long lashai ka sngi.
