Shillong, Jylliew 19 : U Nongialam ka Congress bad MLA/MDC na Mylliem Bah Ronnie V Lyngdoh hynne ka sngi Nyngkong, ula ong ba lada ka Congress kam kyrshan ia ka National Peoples’ Party (NPP) ha Khasi Hills Autonomous District Council (KHADC), ka jingsynshar Administrator ka lah ban wan hapoh ka Council.
Hynriew ngut ki MDC ka Congress kin iatreilang bad ki 12 ngut ki MDC na ka NPP ban thaw ia ka Executive Committee ba thymmai ha KHADC. Ia kane ka kynhun synrop la jer kyrteng da ka Khasi Hills Democratic Front (KHDF).
Haba iakren bad ki nongthoh khubor hadien ka Dorbar lyiur, u Bah Ronnie ula ong ba ka rai bala shim da ka Congress ka dei na ka bynta ka bha ka miat bad ka jingmyntoi jong ka KHADC.
“Shu tharai, lada ngim kyrshan ia ka NPP, ka jingsynshar u Lat kan sa wan hangne” ula ong haba bynrap “Kan kham bha ban ioh synshar hi ban lait na ka jingwan synshar u Lat, dei namar kane ngi kum ka Party ngi la rai ban kyrshan ia ka NPP”.
U bah Ronnie ula ong ba lada ka jingsynshar u Lat kan wan shimti, mano shuh ban iada, pynneh pynsah ia ki riti dustur, ka hok halor ka kyndew ka shyiap jong ka Jaidbynriew Khasi.
“Mynta kan wan sa ka amendment jong ka Sixth Schedule hapoh ka Iingdorbar Parliament, lada ngim don bynta ha ka Amendment ioh ka Parliament ka wanrah noh mynta, mano ban peit ia ka bha ka miat bad ka jingmyntoi jong ngi ha ka riti dustur, ka khyndew ka shyiap” ula ong.
Ula bynrap “Dei halor kine ki nongrim ba ngi la rai ban kyrshan bad lada wan ka Amendment, ngin ioh ban ia ai jingmut bad ia kaba ngi sngew iahap ngin kyrshan bad ia ki bym sngew iahap ngin pyrshah”.
.){kind=link}