Shillong, Risaw 26 : Ka Khasi Hills Autonomous District Council (KHADC) kala thaw mynta ia ka Delimitation Committee, ka ban pynbeit bad pynbiang tarajur ia ka jingheh jingrit jong ki constituency kat kum ka jingdon jong ki nongthep vote.
Ia kane ka Delimitation Committee la thaw hadien ka jingaibor jong u Lat ka Jylla Phagu Chauhan halor ka shithi bala phah da ka Council ban pynbeit thymmai noh ia ki 29 tylli ki constituency ka Council kat kum ka jingdon ki shnong bad ki nongthep vote.
Kane ka Committee ka dei kaban khlieh da u Dr S Kharsyiemlieh, Judge barim ka Iingkashari District Council. Ki dkhot jong ka Committee ki kynthup ia u Dr S.L Marbaniang, MLA barim, Kong R Myrboh, Nonghikai skul bala shongthait, Dr DR L Nonglait prof. Deptt of Khasi, NEHU bad Bah M Kharkrang Secretary barim ka KHADC kum u Secretary.
Haba iakren bad Ka Shlem, u DyChief Executive Member (DyCEM) ba khmih ia ka Tnad Ain, Bah Pynshngain N Syiem, ula iathuh ba kane ka jingkyrpad jong ka Council ia u Lat ka Jylla kala mih hadien ka jingiohpdiang jong ka Council ia ki jingthoh na ki Shnong bapher bapher ban pynbeit thymmai noh ia ki Constituency.
Ula iathuh ba ka jingthaw ia kane ka Delimitation Committee ka long eh ban pynbeit ryntih noh ia ki constituency kat kum ka jingdon ki shnong bad ki nongthep vote ba kin iabiang tarajur.
Haba ai nuksa ula ong “Kum ka Mawlai kaba la don lypa kumba 50,000 ngut ki nongthep vote, mynta sa ka Shnong Mawpat kan hap sha Mawlai ha ka elekshon MDC, kane kala heh shaba palat haba ianujor bad kiwei pat ki constituency”.
Haba kylli, la kane ka jingthmu pynbeit ryntih ia ki constituency kan ym ktah ia ka elekshon MDC kaba lah ban long ha u bnai Rymphang/Lber 2024, u DyCM ula ong “ Ka jingpynbna ban pynlong ia ka elekshon kam pat mih satia…mynta kan shong ha ka Delimitation Committee ban pyndep kloi ia ka kam…ha ka jingpynbna ruh ngi khlem buh por hynrei la shu kdew ban pyndep kham kloi kat kaba lah”.
Haba kylli kaei kaban jia pat ia kane ka jingpynbeit ia ki constituency lada ka Sorkar Pdeng ka mynjur ban pynkylla thymmai ia ki kyndon jong ka Sixth Schedule bad ban pynbun ruh ia ki Seat ha ki District Council, u Bah PN Syiem ula ong, “Kan iarap shibun lada jia ba ha u Nohprah kan don ka Parliament bad ki lah ban wanrah iaka jingpynkylla iaka Sixth Schedule. Nga tharai kan kham suk shibun shuh shuh ia kane ka Committee ba kam dei shuh ban treikam tang naka bynta 29 Seat hynrei haduh 35 ne 37 katkum ka jingpynkylla thymmai ia ki kyndon.
U Deputy CEM ula ong, ba ha u snem 2013, katto katne tylli ki shnong kila ai da ka jingthoh sha ka KHADC ban pynbeit ryntih ha ki Constituency bapher bad ula ai nuksa ba ka shnong Mawkamah mynshwa ka hap haka Nongstoin Constituency hynrei mynta kila kwah ban hap noh ha Rambrai, ka shnong Mawpat kaba hap ha Mawlai mynta kila kwah ban hap noh ha Mawkhar Pynthorumkhrah bad kumta ter ter.
