Shillong, Risaw 26 : U Symbud Myntri Rangbah ka Jylla ba khmih ia ka tnad PWD (Building) Bah Prestone Tynsong ha ka sngi Palei, ula lum ia ka jingialang bishar kam bad pyntip ba ia ka Iingdorbar Thaw Ain ba thymmai ka Jylla kaba la tei ha Mawdiangdiang, yn sa pyndep noh hapoh u bnai Nailar 2024.
Haba iakren bad ki nongthoh khubor, u bah Prestone ula ong “Ngi la shong bishar ia baroh ki kam bad mynta ka jingtrei kala iaid bha bad nga la thikna ba ngin sa lah pyndep noh kat kum ka por kaba buh da ka Sorkar bad kata ka long ha lane shuwa u bnai Nailar 2024”.
U Bah Prestone ula ong ba ka jingtei ia u dome ba thymmai ruh kan sa sdang noh shen.
“Mynta, ha ka jingshisha kila dep ban pynkhuid lut ia ki jakhlia baroh bad ka jingtei nongrim kala iaid shaid shaid bad mynta kila dep ruh ban phah wanrah ia ki tiar prefab…shen kine ki tiar kin sa wan poi ha katei ka jaka bad kin sa sdang ban pynieng noh ia baroh” ula ong.
U Symbud Myntri Rangbah ula ong “Ka jingpynlut bynrap namar ka jingkhyllem u dome kam don satia hynrei ka don tang ka jingpynlut bynrap halor ka jingthied ia ki tiar thymmai tangba ngam don satia ia ki jingtip kiba bniah namar ngi hap ban iakren biang hapoh ka High Powered Committee. Myna ka dei tang ka jingialang bishar kam bad ka Tnad PWD Building ha ryngkat ki contractor bad ruh ka PMC”.
U bah Prestone ula pynpaw ruh ia ka jingsngew skhem ba ka Meghalaya Legislative Assembly kan sa ioh pynlong ia ka dorbar ba nyngkong eh ha kane ka Iingdorbar Thaw Ain ba thymmai ha ka aiom synrai ban wan.
