Shillong Nailar 31: U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem hynne ka sngi Palei, ula pynbna ba ka KHADC kala thaw iaka Committee ka ban peit iaka jingkhuid jingsuba bad ka shongsuk shongshngaiñ ha Iewduh bad ki jaka kiba marjan.
U Bah Pyniaid Syiem haba iakren bad ki nongthoh khubor, ula ong, ba u CEM ka KHADC un long u Chairman jong katei ka Committee katba ki dkhot kin kynthup iaki Executive Member kaba khmih iaka ïew ka hat ka Kong Grace Mary Kharpuri, u Executive Member uba khmih iaka tnad Health & Sanitation u Bah Victor Ranee, u Additonal Deputy Commissioner ka East Khasi Hills u Bah Ronnie Wahlang, u Sector Officer na ka tnad pulit u B Das, ki dkhot na ka tnad Urban Affairs, Shillong Municipal Board, u Syiem ka Hima Mylliem u Paiem Ainam Manik Syiem bad 2 ngut ki Myntri kiba peit iaka ïewduh bad ki Rangbah Shnong na ki 6 tylli ki shnong kiba kynthup ia ka Shnong Umsohsun,Wahingdoh, Mawkhar, Mission Compound, Wahthapbru bad ka Qualapaty kiba don marjan bad ka Ïewduh.
Lah ban ong, dang shen u CEM ka KHADC ryngkat bad ki Executive Member, ka Hima Mylliem bad kiwei kiwei, kila leit ban jurip iaka jinglong jingman jong ka ïewduh khamtam ha kaba iadei bad ka jingkhuid jingsuba bad ka shongsuk shongshngain.
U CEM ka KHADC ula ïathuh ba katei ka Committee kaba la dep thaw kan peit na ka bynta ka jingpyntreikam iaka Solid Waste Management Program jong ka KHADC bad ban pynneh iaka shongsuk shongshngaiñ ha kane ka iew.
Ha kane ka sngi naka liang jong ka seng Hynñiewtrep Ïewduh Association (HIA) kala leit iakynduh ïa u CEM ban ai khublei ïa ka Executive Commitee jongka KHADC halor ka sienjam ba kala shim ban wan jurip ïa ka Ïewduh halor ka jingdonkam ban leh khuid bad ban wanrah ia ka shongsuk shongshngaiñ naba jur palat ki kam sniew naduh ka kloh pla bad kiwei ki kam sniew.
Pule lang ia kane: Shen yn rai ka VPP ia ki kyrtong ban iakhun elekshon MDC
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
